Ulusmedia биллэрбитин курдук, от ыйын 28-29 күннэригэр Бүлүү уонна Үөһээ Бүлүү улуустарыгар былыты ытыалаан ардахтатар ЯК-40 «Метео» сөмөлүөт үлэлээтэ. Түмүгэр, ыаҕастаах уунан кутар ардах түспэтэ да буоллар, бэс ыйыттан күүтүүлээх ибир самыыр икки күн кууран турар сири-дойдуну илиттэ. Самыыр ойуур уотун хаптатыыга, баһаардары умуруорууга көмөлөөх буолуо диэн эрэниэххэ.
Бу күннэргэ ойуур баһаардарын умуруорууга идэтийбит үлэһиттэр: «Якутлесресурс» ГАУ филиалын үлэһиттэрэ, Авиалесоохрана десантниктара, баһаарынайдар уо.д.а. ойуур уотун, саҥа турбут баһаардары умуруоруу ыарахан үлэтигэр күнүстэри-түүннэри сырыттылар. Кинилэр ойуур баһаарыттан кутталлаах кэм саҕаланыаҕыттан Бүлүү улууһун сиригэр-уотугар барыта 24 ойуур баһаарын тохтоттулар.
«Якутлесресурс» ГАУ Бүлүүтээҕи филиалын дириэктэрэ Семен Филиппов бүгүҥҥү күҥҥэ ойуур баһаардарын утары охсуһууну бу курдук билиһиннэрдэ:
— Бүлүү улууһун сиригэр-уотугар бүгүҥҥү күҥҥэ 6 ойуур баһаара умайа турар. Уопсайа, ойуур баһаарыттан кутталлаах кэм саҕаланыаҕыттан барыта 30 ойуур баһаара күөдьүйбүтэ бэлиэтэннэ.
Илбэҥэ Арыылааҕын таһыгар от ыйын 6 күнүгэр саҕаламмыт 18 №-дээх, Лөкөчөөҥҥө 24 №-дээх, Илбэҥэҕэ 30 №-дээх, Тааһаҕарга 29 №-дээх, Чинэкэҕэ 28 №-дээх, Тылгыныга 21 №-дээх баһаардары умуруорууга туох баар күүс-кыах, дьон түмүллэр. Сүрүн баһаардарбыт авиационнай хонтруруол баһаардарын көрүҥэр киирэллэр. Биллэрин курдук, ойуур баһаардара хас да көрүҥҥэ арахсаллар.
Билигин 6 баһаар 34647 га сиргэ тайаата. ГАУ филиалыттан 37 киһи, 28 мобилизованнай, кинилэр ахсаанннара от үлэтэ саҕаланыаҕыттан биллэ аҕыйаата, Авиалесоохранаттан 120 киһи баһаардары тохтотууга, умуруорууга турунан үлэлии сылдьаллар. Итини тэҥэ, баһаары бохсууга 7 булууктаах тыраахтар, ГАУ филиалын ГАЗ танкетката, ГАЗ “Садко” массыыната туттуллар.
Баһаардары утары Ньурбаттан 3, Сунтаартан 5 ГАУ үлэһиитэрэ, МЧС-тан 7 быыһааччы, олохтоох баһаарынай сулууспалар үлэһиттэрэ үчүгэйдик үлэлии сылдьалларын бэлиэтиэм этэ. Айылҕа харыстабылын министиэристибэтин биоресурса департаменыттан 13 киһи Тылгыны баһаарын тохтотууга үлэлииллэр.
«Якутлесресурс» ГАУ Саха сиригэр балаһыанньа ханна ыараханын көрөн, улахан баһаардары умуруорууга дьону, тиэхиньикэни түмэн ыыталыыр. ГАУ Бүлүүтээҕи филиалын үлэһиттэрэ Зырянкаҕа, Тааттаҕа, Үөһээ Бүлүүгэ үлэлээбиттэрэ. Билигин биһиэхэ Горнайтан, Үөһээ Бүлүүттэн, Дьокуускайтан тиэхиньикэ, Уус Маайаттан 40 киһи көмөҕө кэлэрин күүтэбит.
Улуус олохтоохторун кураан күннэргэ ойуурга, ходуһаҕа уоттан сэрэхтээх буоларгытын, ыксаллаах быһыы-майгы биллэриллибит кэмигэр бары ирдэниллэр быраабылалары тутуһан сылдьаргытын, ойуурга, ходуһаҕа кулуһун уотун оттубаккытын санатабын.
Николай Куприянов.