Лөкөчөөҥҥө элбэх ынах сүөһүнү тутар Бүлүү улууһун биир бөдөҥ “Тускул” бааһынай хаһаайыстыбата сүөһүлэрин кыстатар отун Туймаада хочотугар оттуур, сыллата сүөһү дороххой аһылыгын ыраахтан тиэхиньикэнэн тиэйэр үгэстээх.
Биһиги хаһаайыстыба салайааччытын Афанасий Харлампьевы көрсөн, тиэхиньикэ уматыгынан хааччыллыы кыһалҕатын хайдах быһааран эрэллэрин, оттооһун, оту тиэйии туһунан туоһуласпыппытыгар, кини бүгүҥҥү балаһыанньаны бу курдук билиһиннэрдэ:
— Биһиги хаһаайыстыба Лөкөчөөн эргин күөллэр кытыыларынааҕы ходуһалары уонна Тулаҕы утары Өлүөнэ уҥуор өрүс арыытыгар оттуубут. Сүрүн оппутун өрүс арыытыгар бэлэмниибит.
Билиҥҥитэ окко киирэ иликпит. Лөкөчөөн таһынааҕы ходуһаларбыт аһара ардаан ууга сыталлар, кэлиҥҥи кэмҥэ үрэхтэр тардыах курдуктар, онон, атырдьах ыйыгар оттуу киириэхпит.
Лөкөчөөн эргин оттуур оппут сүөһүбүтүгэр тиийбэт буолан, Өлүөнэ уҥуор кыһалҕаттан оттуубут. Өлүөнэ уҥуор сытар сирбит өрүс халааннаан эмиэ ууга былдьанна. Билигин уу биллэ түһэ турар, кэлэр нэдиэлэттэн өрүс арыытыгар оттуу киириэхпит.
Хаһаайыстыбабыт сүрүн отун – 400 т кэриҥэ курдугу өрүс арыытыгар оттуубут. Оппутун атастаһан, атыылаан, өрүс бэтэрээтиттэн эрдэ соҕус 100 т тиэнээччибит. Оттообокко эрэ от ханна үүммүтүн көрдүү сылдьыахтааҕар арыыга оттуур судургу курдук. Кылгас кэм иһигэр кыстыыр оппутун булуохпутун сөп.
Бүгүҥҥү күҥҥэ биһиги хаһаайыстыбаҕа 100 ыанар ынахтаахпыт, уопсайа 200-тэн тахса сүөһүлээхпит.
Үүтү соҕотуопкалаан үүт, суорат, йогурт, иэдьэгэй, сыр астыыр тэрилтэбит “Туйгун-Ас” буолар. Үүт астыыр сыах бородууксуйатын Бүлүү куоратын олохтоохторугар үс маҕаһыыҥҥа түҥэтэн батарабыт. “Туйгун-Ас” үүтү Лөкөчөөн, Илбэҥэ хаһаайыстыбаларыттан тутар.
Тыа хаһаайыстыбатын уматыгынан хааччыйыы боппуруоһа быһаарыллан эрэр. Ыраахтан оту тиэйиигэ биир сырыыга биир массыынаҕа 400 л туттуллар. Биһиги “Сибойл” хампаанньаны кытта сөбүлэһии түһэристибит. Барыта 300 тыһ. солк. уматык хаартатыгар диэн аһартыбыт, онон, сотору хаартыбытын ылыахтаахпыт уонна Илбэҥэҕэ “Сибойл” сапараапкатыттан уматыкпытын куттуохпут.
Дьэ, ити курдук, Бүлүү куоратын үрүҥ аһынан хааччыйа олорор “Тускул” хаһаайыстыба салайааччыта Афанасий Харлампьев быйылгы оттооһуҥҥа уматыгынан хааччыллыы туһунан быһааран биэрдэ.
Николай Куприянов,
Лөкөчөөн “Тускул” бааһынай хаһаайыстыба ынахтара.