Улуустааҕы тыа хаһаайыстыбатын департаменын салайааччы, оройуон Сэбиэтин депутата Павел Иннокентьев сайыҥҥы биир саамай эппиэттээх — оттооһун кэмигэр тыа хаһаайыстыбатын салаатын тиэхиньикэ уматыгынан хааччыйыы хайдах быһаарыллан эрэрин туһунан бу курдук билиһиннэрдэ:
— Биллэрин курдук, тыа хаһаайыстыбатын уонна аска-үөлгэ бэлиитикэ, гражданскай оборона уонна ыксаллаах быһыы-майгы министиэристибэлэрэ улуус тыатын хаһаайыстыбатын кэпэрэтииптэрин, бааһынай уонна кэтэх хаһаайыстыбаларын хааччыйарга 75 т уматыгы анаабыттара.
Хаһаайыстыбалар Бүлүү куоратын “Сервис-Ойл”, “Саханефтегазсбыт” уонна “Сибойл”, Хампаҕа “Туймаада-нефть” сапараапкаларыттан уматык хаартата оҥотторон куттуохтаахтар. Бүлүү куоратыгар үлэлиир “Сервис-Ойл” сапараапка “Туймаада-нефть” хампаанньаҕа киирсэрин санатыахха сөп.
Бүгүҥҥү күҥҥэ, ити түөрт сапараапка хаһаайыстыбалары уматыгынан хааччыйарыгар күүстээх үлэ бара турар.
“Туймаада-нефть” сапараапкатыттан уматыгы куттуохтаах хаһаайыстыбалар 80 % туһаннылар. “Сервис-Ойл” сапараапкатыттан хаһаайыстыбалар эмиэ кутуннулар, билигин 3 т ордон хаалла.
“Саханефтегазсбыт” хампаанньа 30 т уматыга тэрээһиннээх, бааһынай, кэтэх хаһаайыстыбаларынан үллэриллибитэ. Дьаһал кэллэ, онон, тэрээһиннээх хаһаайыстыбалар уматык хаарталарыгар харчы аһартылар да куттубутунан барыахтара. Кэтэх хаһаайыстыбаларга уу харчынан таараҕа кутуохтара.
“Сибойл” дьаһалын таһаарда, тэрээһиннээх уонна бааһынай хаһаайыстыбалары уматыгынан хааччыйыахтаах.
Улуус үрдүнэн хаһаайыстыбалар 75 т уматыгы толору туһаныахтара, харчыларын уматык хаартатыгар аһардыбыт ыраах нэһилиэктэр хаһаайыстыбалара суол алдьанан кыайан киирбэккэ олороллор.
Бүгүҥҥү күҥҥэ Бүлүү улууһун хаһаайыстыбалара көрүллүбүт 75 туоннаттан 20 т тутуннулар, ол эбэтэр, көрүллүбүт уматыктан 28 % туһаннылар.
Дойдуга тиэхиньикэ уматыгынан хааччыйыы балаһыанньата бигэтийэн эрэрэ көстөр, өрөспүүбүлүкэ иһигэр Ил Дархан Айсен Николаев быһаарыытынан үүт-эт оҥорор хаһаайыстыбалар тиэхиньикэ уматыгын окко туһаналлара быһаарылынна. Атырдьах ыйыгар балаһыанньа көнүөҕэр эрэл баар.
Бу күннэргэ ыраах хаһаайыстыбалар киирэн оттуур уматыктарын куттуохтара.
Николай Куприянов.