Бүлүү улууһугар элбэх ынах сүөһүлээх тыа хаһаайыстыбатын кэпэрэтииптэрин, Анастасия Кырбасова, Сидор Ионов уонна Афанасий Харлампьев салайар үс бөдөҥ, итини сэргэ орто уонна кыра бааһынай хаһаайыстыбалары, кэтэх хаһаайыстыбалары от кэмигэр хааччыйарга диэн 75 т дизель уматыга анаммыта.
Оттуур хаһаайыстыбалар Бүлүү куоратын “Туймаада-нефть”, “Саханефтегазсбыт”, “Сервис-Ойл” уонна “Сибойл” хампаанньалар сапараапкаларыттан уматыгы куттуохтаахтар. Хаһаайыстыбалар билигин дуогабардары түһэрсэн, үбү аһардан, хампаанньалар уматыкка хаарталарын оҥотторо сылдьаллар.
Итин сэргэ, отчуттарга көрүллүбүт 75 тоннаттан “Саханефтегазсбыт” нөҥүө 13 нэһилиэккэ 13 т дизель уматыга тыырылынна.
Бүлүү улууһугар тыа хаһаайыстыбатын кэпэрэтииптэрин, кэтэх хаһаайыстыбалары от кэмигэр дизель уматыгынан хааччыйыыга суһал ыстаап тэриллэн үлэлиир.
Суһал ыстаап чилиэнэ, улуустааҕы тыа хаһаайыстыбатын департаменын салайааччы Павел Иннокентьев хаһаайыстыбалар хампаанньалар уматыкка хаарталарын түргэнник оҥорторо охсоллорун тоһоҕолоон бэлиэтиир.
Биһиги “Саханефтегазсбыт” сапараапкатыгар Бүлүү куоратын кыһыннары-сайыннары үүтүнэн хааччыйар “Ампаардаах” ХЭУО салайааччытын Симон Томскайы көрүстүбүт, кини хаһаайыстыба уматыгынан хааччыллыытын бу курдук билиһиннэрдэ:
— Биһиги улууска анаммыт 75 т дизель уматыгыттан 7 т ылыахтаахпыт, билигин хаһайыстыбаҕа 1 т курдук хаалла. Бу күннэргэ уматыкка хаарта оҥорторуом.
Биһиги хаһаайыстыба сааскы ыһыы үлэтигэр 6 т, оту бэлэмнээһиҥҥэ 5 т, бурдук хомууругар, сенаж, сиилэс бэлэмнээһинигэр эмиэ 5 т курдук сэлээркэни туттабыт, сайыҥҥы кэмҥэ барыта 16-18 т дизель уматыгар наадыйабыт.
Быйыл 35 гектар сиргэ киһи сиир сэлиэһинэй бурдугун ыстыбыт, “Ампаардаахха” 110 ыанньык ынаҕы, барыта 300-кэ сүөһүнү тутабыт, — диэн Симон Томскай билиһиннэрдэ.
Николай Куприянов.