Балаҕан ыйын 18-20 күннэригэр ыытыллыахтаах IX ыҥырыылаах Госдума депутаттарын быыбардарыгар бэлэмнэнии быһыытынан Саха сирин Киин быыбардыыр хамыыһыйата Дьокуускайга тэрийэр семинардарыгар, вебинардарыгар Бүлүү улууһун быыбардыыр хамыыһыйатын салайааччылара кытталлар, үөрэнэллэр.
Территориятааҕы быыбардыыр хамыыһыйа бэрэссэдээтэлэ Тимофей Иванов быйыл күһүн ыытыллар Госдума депутаттарын быыбардарын тэрийэр улуустааҕы хамыыһыйалар салайааччыларын семинардарыгар кытынна уонна семинар туһунан санаатын үллэһиннэ:
— Евгений Федоров салайааччылаах Саха сирин Киин быыбардыыр хамыыһыйата күһүҥҥү быыбардарга бэлэмнэнии үлэтин чэрчитинэн быыбары тэрийээччилэргэ элбэх үөрэтэр семинардары ыытара хайҕаллаах уонна биһиэхэ улахан туһалаах.
Биһиги семинардарга дойдубут инники сайдыытыгар улахан суолталаах Госдума быыбарын ыытыы тэрээһинин, турар ирдэбиллэри, сокуоҥҥа уларытыылары билистибит.
Быйыл Территориятааҕы быыбардыыр хамыыһыйа үлэтин от ыйын 20 күнүттэн саҕалыа, УИК-тартан “ИнформУИК” бырайыакка кыттааччылар атырдьах ыйын 20 күнүттэн саҕалаан балаҕан ыйын 15 күнүгэр диэри дьиэлэри кэрийиини, быыбар туһунан быһаччы билиһиннэриини ыытыахтара.
Ааспыт быыбардарга Бүлүү улууһугар “ИнформУИК” бырайыак ситиһиилээхтик үлэлээбитин ахтыахха сөп. Куоластааһыны тэрийэр УИК-тар үлэлэрин балаҕан ыйын 7 күнүттэн саҕалыахтара, — диэн Тимофей Иванов билиһиннэрдэ.
ТИК бэрэссэдээтэлин солбуйааччы, “Быыбар” ГАС системнай администратора Егор Рожин нэдиэлэ устата күһүҥҥү быыбарга “Быыбар” ГАС саҥа информационнай технологияларын туттууга, быыбардааччылар испииһэктэрин чуолкайдааһыҥҥа уо.д.а. сыһыаннаах семинар үлэтигэр кытынна.
— Быйыл кыһын дойду үрдүнэн “Быыбар” ГАС 2.0 диэн саҥа бырагыраамаҕа көспүппүт. Ити бырагыраамаҕа быыбар түмүктэрин киллэриини, быыбардааччылар испииһэктэрин чуолкайдааһыны дьүүллэстибит, итини сэргэ быыбардааччыга быыбар туһунан информацияны быһаччы тиэрдиигэ аналлаах “ИнформУИК” бырайыагы үлэлэтиини ырытыстыбыт.
Семинарга элбэх саҥаны биллибит-көрдүбүт, — диэн Егор Рожин билиһиннэрдэ.
Атырдьах ыйыгар Бүлүү куоратыгар УИК-тар салалталарыгар аналлаах Госдума депутаттарын быыбардарын ыытыыга улуустааҕы семинардар тэриллиэхтэрэ.
Фотоларга: семинар кэмигэр Тимофей Иванов Киин быыбардыыр хамыыһыйа бэрэссэдээтэлин Евгений Федоровы, бэрэссэдээтэли солбуйааччы Иван Андросовы кытта.
Егор Рожин “Быыбар” ГАС админнарын семинарыгар.
Николай Куприянов,
Эльвира Мярикянова фотолара