Балаҕан ыйын 11 күнүгэр Чачаҥда сайылыгар «1 Күүлэт» ПК төрүттэммитэ 25 сылыгар аналлаах тэрээһиннэр ыытылыннылар.
Ол курдук кээпэрэтиип саҥа балаҕанын үөрүүлээхтик арыйыы, «Чачаҥда илгэлээх туоната» диэн кинигэни сүрэхтээһин, «Үлэ Кыһыл Знамята» уордьан кавалера, ыччат наставнига Екатерина Саввична Семеноваҕа аналлаах өйдөбүнньүк барельевы арыйыы уо.д.а.
От үлэтэ бүппүтүнэн, этэҥҥэ кыстыкка киирэр «Атырдьах сууйуута» Ыһыах үөрүүлээх чааһыгар үлэ дьонун чиэстээтилэр, бастыҥ отчуттарга, үлэһиттэргэ харчынан сертификаттары, бэлэхтэри туттардылар. 
Кээпэрэтиип үлэһиттэрин икки ардыгар сонун, интэриэһинэй күрэхтэһиилэр ыытылыннылар, түһүмэхтэринэн бастыҥнары быһаардылар:
бириэмэҕэ ынах ыаһыҥҥа, кууллаах комбикорму сүгүүгэ уонна быатын сүөрүүгэ, үүт туттарыытыгар, трактористарга, суоппардарга күрэстэр. 
Кыайыылаахтар харчынан, сыаналаах бириистэринэн наҕараадаланнылар.
«Эр бэрдэ» диэн спортивнай күөн күрэс хас биирдии түһүмэҕэр бастаабыттарга эмиэ туспа бириистэр туттарыллыннылар. Түмүккэ кыайыылаах аатын ылбыт Эдуард Атаманов убаһанан наҕараадаланна.
Ити курдук үрүҥ илгэни үрүлүтэр, быйаҥы элбэтэр, хороҕор муостааҕы иитэр туруу үлэһит дьоҥҥо анаммыт тэрээһин үрдүк таһымнаахтык тэрилиннэ.