2 Күүлэккэ уулуссалары тупсараллар, суоллары оҥостоллор

Бүлүү улууһун бөһүөлэктэригэр уулуссалары, нэһилиэктэр икки ардыларынааҕы суоллары тупсарыыга, оҥорууга улуус дьаһалтата сыллата муниципальнай бырагырааманан сөптөөх үбүлээһини көрөр. Быйыл итинник бырагырааманан улуус саамай хоту уһугар сытар нэһилиэгэр – II Күүлэккэ киин уулуссаны тупсардылар. Ити үлэ туһунан II Күүлэт нэһилиэгин баһылыга Юрий Спиридонов билиһиннэрдэ:

Биһиги нэһилиэктэн улуус киинигэр диэри I Күүлэт нэһилиэгинэн кыһын эрэ суол баар буолар. Былырыыҥҥыттан II Күүлэттэн I Күүлэккэ диэри суолга субуотунньук тэрийэн муосталары оҥостобут. Быйыл үһүс муостабытын ситэрдибит.

Нэһилиэк бүддьүөтүн үбүнэн — 200 тыһ. солк. суумаҕа I Күүлэккэ барар суолга 2 дамбаны тэҥнэтэн, дэхсилэтэн биэрдибит

Бөһүөлэк иһинээҕи уулуссаны оҥорууга улуус 1,8 мөл. солк., бэйэбит бүддьүөппүтүттэн кыра сууманы көрбүппүт. Киин уулуссабытын кутуу суол оҥорон үрдэтэн биэрдибит, 600 м уһуҥҥа буор, үрдүгэр 10 см халыҥнаах гравий куттардыбыт.  Уулуссаны тендергэ кыайбыт Тылгыныттан «Дьыыппа-строй» тэрилтэ оҥордо.

Ити  курдук, улуус көмөтүнэн ыраах нэһилиэктэр уулуссаларын тупсараллар, суолларын оҥостоллор.

Николай Куприянов.

Читайте дальше