Дьоллоох Дьокуускай куоракка ахсынньы 4 күнүгэр педагогическай үлэ бэтэрээнэ, РСФСР үөрэҕириитин туйгуна, СӨ үөрэҕириитин бочуоттаах үлэһитэ, СӨ «Учууталлар учууталлара» бэлиэлээх, Бүлүү улууһун, куоратын бочуоттаах олохтооҕо Мария Афанасьевна Тимофеева үрдүк аатыгар «Сырдыкка, кэрэҕэ тардыһан» диэн өрөспүүбүлүкэтээҕи фольклор куонкурса «Үрүччэ» образцовай ансаамбыл 35 сыллаах үбүлүөйүгэр ананан үрдүк таһымҥа ааста.
Талыллыбыт бастыҥ нүөмэрдэр, фольклору таптааччылар, сэҥээрээччилэр күөн көрүстүлэр. Бииртэн биир чаҕылхай нүөмэр көрөөччүлэри сэргэхситэн, хабыллар ытыс тыаһынан кыттааччылар сүргэлэрин көтөхтө, санааларын күүһүртэ. Дьокуускай куораттан, Мэҥэ Хаҥаластан, Уус-Алдантан, Амматтан, Чурапчыттан, Сунтаартан, Бүлүү улууһуттан тыымпылар «Байанай» үҥкүүлэринэн, кыргыдайдар чобуо чабырҕахтарынан, сыдыбыллар олус бэрт олоҥхолорунан кыттыыны ыллылар.
Үбүлүөйдээх киэһэ үҥкүү-битии аргыстаах, ырыа-тойук доҕуһуоллаах буолан ааста. Урукку кэминээҕи «Үрүччэ» историятын, сайдыытын кэпсиир видеолар көстүбүттэрэ көрөөччү болҕомтотун тарта, ааспыт сыл ахтылҕанын санатта.
Өссө төгүл «Үрүччэ» образцовай ансаамбылы өрөгөйдөөх үбүлүөйгүтүнэн истиҥник эҕэрдэлиибит. Сайдыҥ, чэчирээҥ, саҥа сулустар халлааҥҥа өссө күөрэччи сырдыы, чаҕылыйа турдуннар.
Василиса Окоемова.