Быйыл 2024 сылы Ил Дархаммыт Саха сиригэр оҕо сылынан биллэрэн, бу чэрчитинэн өрөспүүбүлүкэҕэ араас хабааннаах үлэлэр ыытыллаллар.
Бүлүүтээҕи ыччат библиотеката былааннаммытынан бу хайысхаҕа тиһигин быспакка үлэлиир. Ол курдук сайыҥҥы кэмҥэ ааҕарын, уруһуйдуурун сөбүлүүр оҕолорго аналлаах биир нэдиэлэлээх смена үлэлэтэн, элбэх оҕону хабан дьарыктаабыта.
Онтон күһүҥҥү каникулга оҕо дьарыктаах буоларын ситиһэн, нэдиэлэ устатын тухары «Ыччат библиотекатыгар аһаҕас аан» диэн тэрээһини тэрийдэ. Саҥа кэлбит кинигэлэри билсэн, викториналарга оонньоон, ойуулуктары көрөн, интэриэһинэй бэсиэдэлэри истэн, оҕолор көхтөөх сахалыы остуол оонньуутун оонньоотулар . Онно оҕолор саамай сөбүлээбит оонньууларынан тыксаан буолла. Күн аайы элбэхтии буолан мустан тыҥааһыннаах киирсии кэнниттэн “Бастыҥ тыксаанньыт” быһаарылынна.
Өбүгэлэрин саҕаттан билиҥҥи кэмҥэ диэри кэлбит остуол оонньуулара оҕону өй-санаа өттүнэн булугас, тобуллаҕас буоларыгар үөрэтэр.
Маннык тэрээһиннэр оҕо, ыччат библиотекаҕа сылдьыытын биллэрдик көҕүлүүр.
Мария Иванова, ыччат библиотекатын сүрүннүүр библиотекара.