Тохсунньу 25 күнүгэр Кыадаҥда нэһилиэгэр ахтар-саныыр тапталлаах суруйааччыбыт, саха народнай поэта, СӨ искусствотын үтүөлээх деятелэ, Саха комсомолун аатынан бириэмийэ аан бастакы лауреата, «Хотугу сулус» диэн Россия литературнай бириэмийэтин маҥнайгы лауреата, Бүлүү улууһун бочуоттаах олохтооҕо Иван Михайлович Гоголев төрөөбүтэ 95 сылыгар аналлаах улуустааҕы «Ааппын ахтан аһараарыҥ…» ырыа күрэҕэ үрдүк таһымҥа буолан ааста.
Бу бырайыагы Кыадаҥдатааҕы Н.Х.Константинов аатынан «Күндэ» сынньалаҥ киинин уус-уран салайааччыта Олимпиада Семеновна Рыкунова 2020 сыллаахтан саҕалаан, олоххо киллэрэн, бу улахан тэрээһин иккис төгүлүн ыытылынна.
Кулууп аанын арыйааккын кытта, ураты сымнаҕас эйгэ, амарах үлэһиттэр, ыраас дьиэ-уот киһи эрэ үөрүөх, сүргэтэ көтөҕүллүөх курдук. Манна Тыымпыттан, Сыдыбылтан, Кыадаҥдаттан, 2 Күүлэттэн, Кыргыдайтан, Кыһыл-Сыыртан, Өкүндүттэн, Бүлүү куоратыттан үгүс ырыаһыт түмсэн, дьоро киэһэ ырыа истиҥ эйгэтигэр ааста. Муусука ураты алыбар уйдаран, кыттааччылар долгуйа астыннылар, көрөөччүлэр эдэрдиин-эмэнниин тохтоло суох хабыллар ытыс тыаһынан, ыһыынан-хаһыынан саала иһин толордулар.
Көрөөччү, Кыадаҥда олохтооҕо, пенсионер Протопопов Сергей Викторович санаатын үллэстэр: «Наһаа үчүгэй ырыалары истэн астынан аҕай олоробут. Манна иккистээн ыытылынна. Нэһилиэк олохтоохторо сэргэхсийдибит. Ыраахтан да айаннаан кэлбиттэр. Ырыалара, таҥастара да үчүгэйин. Бииртэн биир үчүгэй. Сиэммитин кытта сылдьабыт. Кулууппут кыргыттарыгар маннык тэрээһини тэрийбиттэригэр махтанабыт».
Ырыаны таптааччылар, муусуканы сэҥээрээччилэр ис дууһаларыттан арыллан, бэйэ-бэйэлэрин уруккуттан билсэр курдук ураты-истиҥ сыһыаны олохтоон, үөрүү-көтүү эйгэтигэр баар буола түстүлэр. Бииртэн биир кэрэ куолас, сэргэх ырыа, ураты таҥас-сап тэрээһин таһымын өссө үрдэттэ. И.И. Тулааһынап баянын тыаһа, толорор маастарыстыбата киһи эрэ көрөн, истэн олоруоҕун курдук таттарыылаах, дириҥ ис хоһоонноох. Дьүүллүүр сүбэ түмүк таһаарыар диэри, аһаҕас микрофон бэриллэн, ким баянныыр, ким ыллыыр, ким үҥкүүлүүр — бука бары көҥүллүк ырыа-тойук ортотугар сэргэхсийдилэр.
Күрэҕи Ольга Николаевна Корякина салайааччылаах үрдүкү таһымнаах дьүүллүүр сүбэ сыаналаата, ырытта. Биирдиилээн ырыаһыттар: 3 үктэл — Васильева Розалия (2 Күүлэт), 2 үктэл — Тобохова Людмила (Бүлүү к.), 1 үктэл — Харлампьева Светлана (Бүлүү к.), 3 үрдэл — Данилов Иван (Өкүндү), 2 үрдэл — Семенова Камилла (Бүлүү к.), 1 үрдэл — Васильев Михаил (Бүлүү к.). 
Ансаамбылларга : 3 үктэл — «Күбэйэ» (Сыдыбыл), 2 үктэл — «Сардаҥа» (Кыһыл Сыыр), 1 үктэл — «Дайаана» (Сыдыбыл), 3 үрдэл -«Туйаара» (Кыргыдай), 2 үрдэл «Күндэ Далбардара» (Кыадаҥда), 1 үрдэл — «Уйгу» (Тыымпы).
«Кылаан Кыайыы» хаһаайката — Сивцева Матрена Петровна ылыан ылла. «Көрөөччү биһирэбилэ» Чочу нэһилиэгиттэн Иванов Валерийга тигистэ. Кылаан Кындыл анал бирииһин Бүлүү куоратыттан Михаил Васильев ылла. Ааттаах дьону кытта алтыһан, талааннаах ырыаһыттары көрөн-истэн, сатабыл, сүбэ ылан кыттааччылар үөрүүлэрэ үгүс.
Бу улахан тэрээһин, аһаҕас ырыа күрэҕин спонсордара: И.М.Гоголев-Кындыл аатынан Чочу орто оскуолата (сал.Иванова В.А.), И.М.Гоголев — Кындыл аатынан Чочутааҕы түмэл (сал.Алексеева Г.Н.), » Халбаакы нэһилиэгэ» тыа сирин түөлбэтэ (баһылык Васильев А.И.), «У Розы» маҕаһыын (сал.Егорова Р.Н.), Бүлүү улууһун оройуоннааҕы култуура сайдыытын уонна норуот айымньытын киинэ (сал. Дашевская А.А.), Кыадаҥдатааҕы Г.И.Чиряев түмэлэ (сал.Томскай М.С.), И.М.Гоголев аатынан Бүлүүтээҕи кииннэммит модельнай библиотека (сал.Харлампьев Н.Н.), Кылаан Кындыл анал бирииһэ (музыкальнай анал студияҕа биир ырыа аранжировката).
Тэрээһиҥҥэ көмөлөспүт спонсордарбытыгар үгүс сүбэҕит-амаҕыт, көмөҕүт иһин тэрийээччилэр, кыттааччылар ааттарыттан барҕа махталбытын тиэрдэбит. «Күндэ» сынньалаҥ киинин уус-уран салайааччытыгар Рыкунова Олимпиада Семеновнаҕа, дириэктэр Буслаева Кристина Николаевнаҕа айымньылаах үлэҕит өссө арыллан, сайдан киэҥ эйгэҕэ тахсан истин диэн баҕа санаабытын этэбит.
Василиса Окоемова, Кыргыдай.