Айгимар Нифонов остуол тенниһигэр Бүлүү хамаандатын эрэлин толорон чемпион үрдүк аатын ылары ситистэ.
Айгимар Нифонов спартакиада оонньооччуларыттан саамай үрдүк — 426 бааллаах рейтиннээх уопуттаах оонньооччу буолар. Кини аныгылыы тиэхиньикэни туттара, баһылаабыта оонньуу кэмигэр чаҕылхайдык көһүннэ. Кини Бүлүү хамаандатын оонньооччуларыгар күрэхтэһии кэмигэр сүбэ-ама биэрэр, бэрт өйдөнүмтүө гына оонньуу кистэлэҥнэрин кэпсиир, көрдөрөр эбит.
От ыйын 15 күнүгэр «Дружба» спорт саалыгар тэриллибит күрэхтэһиигэ Айгимар Нифонов бары утарылаһааччыларын бэрт дөбөҥнүк кыайталаата, киниэхэ улахан утарылаһыыны ким да оҥорбото. Түмүгэр, Айгимар Нифонов Бүлүү хамаандатыгар иккис кыһыл көмүс мэтээли аҕалла.
Улуустааҕы спорт кэмитиэтин бэрэссэдээтэлэ Гаврил Евсеев билиһиннэрбитинэн, от ыйын 15 күнүн киэһэтигэр Бүлүү улууһун хамаандата бэйэтин бөлөҕөр 2, уопсай бөлөххө 3 миэстэҕэ иһэр. Сарсын дуобакка икки категорияҕа, олорон эрэ волейболга, голболга быһаарыылаах киирсиилэр күүтэллэр.
Николай Куприянов.