Бүгүн биһиги Ил Дархаммыт Айсен Николаев Ил Түмэн дьокутааттарыгар уонна өрөспүүбүлүкэ олохтоохторугар туһуламмыт этиилэрин иһиттибит.
Ил Дархан этиитигэр олохпут сайда турарын, үгүс үтүө саҕалааһыннар, ситиһиилэр баалларын бэлиэтээтэ, быйыл биһиги мөлүйүөн ахсааннаах өрөспүүбүлүкэ буолбуппутун санатта.
Тутууларга улахан болҕомто уурулларын эттэ. Инникитин да элбэх саҥалыы тэрээһиннээх медицинскэй эбийиэктэр үлэҕэ киириэхтэрэ диэтэ. Холобур, саҥа онкоцентр үлэҕэ киирдэҕинэ, ыарыһахтар ыраата барбакка, дойдуларыгар көрдөрүнэн, ыарыыларын быһаартаран эмтэниэхтэрэ диэтэ.
Ил Дархан кэлэр 2024 сылы өрөспүүбүлүкэҕэ Оҕо саас сылынан биллэрдэ, оҕолорго араас көмө, чэпчэтии көрүллүөҕэ диэн эттэ. Холобур, «Карта юного жителя» диэн картанан оҕолор култуура, спорт тэрээһиннэригэр чэпчэтиилээх сылдьар буолуохтара диэн биллэрдэ.
Мин Айсен Сергеевич СВО кыттыылаахтарыгар уонна кинилэр дьиэ кэргэттэригэр көмө өссө күүһүрүө диэбитин олус сэргии иһиттим. Олох араас таһымыгар элбэх чэпчэтиилэр, үлэҕэ киирэллэригэр көмө, атын да элбэх чэпчэтии элбиэ, болҕомто өссө күүскэ ууруллуо диэтэ.
Өссө биир үөрэ истибит этиим суол оҥоһуутугар буолла. Ол эбэтэр сүрүннээн дойду Президенэ Владимир Путин дьаһалларынан суол оҥоһуута барар буоллаҕына, биһиги өрөспүүбүлүкэбитигэр «Проведение соответствий нормативам» диэн бырагырааманан суоллар үчүгэйдик оҥоһуллуохтара, өссө эбии тупсуохтара диэтэ.
Уопсайынан, Ил Дархан Айсен Николаев этиилэрин сэргии, үөрэ иһиттибит.
Акимар Михайлов, 1 Тоҕус нэһилиэгин баһылыга.