Бүлүү куоратын Хомустаах түөлбэтигэр хас сыл аайы Саҥа дьылы көрсө кэрэттэн кэрэ, саҥаттан саҥа хаар оҥоһуктар олохтоохтору үөрдэллэр. Бу оҥоһуктары Александр Игоревич Комаров чочуйан таһаарар. Үтүө үгэһин тутуспута номнуо 30 сылын туолла.
— 1994 сыл бастакы кыыспытын оҕолонон, 1995 сылы көрсө Тымныы оҕонньору уонна Хаарчаананы оҥорбутум, ол кэннэ сыл ахсын оҥоробун, — диэн кэпсиир Александр Игоревич. Кэлин дьиэ кэргэним бары кэриэтэ тахсан кырааскатыгар көмөлөһөр буолбуттара.
Оҕолор улааппыттарын кэннэ тэлгэһэ таһыгар оҥорор буолбутум.
Дьон-cэргэ сэҥээрэллэрин истэн бары үөрэбит. Сыл ахсын саҥа дьыл иннигэр билэр-билбэт дьонум: «Быйыл тугу оҥороҕун?» — диэн ыйытар буоллулар.
Элбэх киһи дьиэ кэргэнинэн кэлэн хаартыскаҕа түһэн бараллар. Быйыл ким эрэ хаар остуол үрдүгэр «СПАСИБО» диэн суруйан барбыт.
Быйылгы композицияны Иэйэхсит сылыгар уонна араҥаччылыыр, көмүскүүр аанньалларга анаатым. Үүммүт саҥа дьылга бары көмүскэллээх, эрэллээх, бигэ санаалаах, дьоллоох буоларгытыгар баҕарабын!
Изольда Загитова.