Соторутааҕыта АЛРОСА экологическай киинин сүрүннүүр инженердэрэ Герой Н.С.Степанов аатынан Бүлүүтээҕи 3 N-дээх орто оскуола 8 кылааһын үөрэнээччилэрин кытта көрсүстүлэр, айылҕа харыстабылын туһунан кэпсэттилэр.
Үүнэн иһэр көлүөнэ ыраас тулалыыр эйгэҕэ улаатара барыбытыттан тутулуктааҕын тоһоҕолоон эттилэр. Бу көрсүһүү туһунан оҕолор ааттарыттан 8 кылаас үөрэнээччитэ Кристина Егорова бу курдук кэпсээтэ:
- Биһиги кылааспыт уонна атын кылаастар буолан АЛРОСА үлэһиттэрин кытта субуотунньукка кыттыбыппыт. Ол курдук П.Х.Староватов аатынан кыраайы үөрэтэр музей аннынан биэрэккэ сытар бөҕү-сыыһы хомуйбуппут. Ону таһынан бу күн экологическай бэсиэдэ буолбута. Онно бэрт элбэх интэриэһинэйи истибиппит, бу көрсүһүүнү олус сэргээбиппит. Кэпсэтии түмүгэр АЛРОСА-тан өйдөбүнньүк бэлэх тутан наһаа үөрбүппүт. Түгэнинэн туһанан, биир дойдулаахтарбытын, чуолаан оҕолору төрөөбүт айылҕабытыгар, Эбэбитигэр харыстабыллаахтык сыһыаннаһыаҕыҥ диэн ыҥырабыт.
Маны таһынан АЛРОСА оскуолаҕа олус туһалаах «Пчелка-У-Био» диэн кыракый лаборатория бэлэхтээн барытбытын үөртэ. Бу лаборатория оҕолор чинчийэр, үөрэтэр араас бырайыактарыгар туһалаах буолара саарбаҕа суох.
Василина Татаринова.