Бэҕэһээ, от ыйын 16 күнүгэр, киэһэ «Амма-Олимп» стадиоҥҥа киэҥ далааһыннаахтык ыытыллыбыт «Дьулуур» XIV спартакиаданы үөрүүлээхтик түмүктээһин тэрээһинэ ыытылынна. Спартакиада былааҕа бүлүүлэргэ туттарылынна.
Спартакиаданы үөрүүлээх түмүктээһиҥҥэ Саха Өрөспүүбүлүкэтин Бэрэссэдээтэлин солбуйааччы, спартакиаданы тэрийэр хамыыһыйа салайааччыта Сергей Местников, спорт уонна физическэй култуура миниистирэ Леонид Спиридонов, Саха сиринээҕи параолимпийскай кэмитиэт салайааччыта Николай Дегтярев уо.д.а. кыттыыны ыллылар, кыттыбыт спортсменнарга махтаннылар, аныгыскы спартакиада 2026 сыллаахха Бүлүүгэ тэриллэрин тоһоҕолоон бэлиэтээтилэр.
«Дьулуур» спартакиадаҕа 24 улуустартан, куораттартан 816 доруобуйаларынан хааччахтаах спортсменнар барыта 6 көрүҥҥэ күрэхтэстилэр, бастыҥ аатын былдьастылар. Күрэхтэһиилэр истибэт, сүһүөхтэрэ ыалдьар спортсменнарга араарыллан ыытылыннылар.
Спартакиадаҕа барыта 86 мэтээл оонньонно, 5 киһи спорт маастарын үрдүк аатын ыллылар.
Спартакиада түмүгүнэн Бүлүү улууһун хамаандата бэйэтин бөлөҕөр Дьокуускай куорат уонна Мэҥэ-Хаҥалас улууһун кэннилэриттэн үһүс миэстэни ылары ситистэ.
Спартакиада үс бөлөҕүнэн араарыллан тэрилиннэ. Бары кыайыылаахтарга, призердарга Кубоктар туттарылыннылар.
Спартакиада үөрүүлээх түмүктэниитигэр Амма улууһун баһылыга Степан Кузьмин Бүлүү улууһун баһылыгар Сергей Винокуровка спартакиада былааҕын туттарда. 2026 сыллаахха ыытыллыахтаах «Дьулуур» XV спартакиада былааҕын тутар 5 киһилээх бөлөххө улуус баһылыгын спартакиада геройдара — кыһыл көмүс мэтээллэри ылары ситиспит Арассыыйа чемпионатын призера Татьяна Манжурьева уонна Арассыыйа таһымнаах күрэхтэһиилэр кыайыылаахтара Айгимар Нифонов, улуустааҕы спорт кэмитиэтин салайааччы Гаврил Евсеев, спорт бэтэрээнэ, улуус, куорат бочуоттаах олохтооҕо, үтүөлээх үлэһит Маргарита Куличкина арыаллаатылар.
Үөрүүлээх тэрээһиҥҥэ улуус баһылыга Сергей Винокуров тулуурдаах уонна дьулуурдаах спортсменнар спартакиада геройдара буолалларын, Бүлүүгэ тэриллиэхтээх аныгыскы спартакиаданы — параолимпиаданы улуус ситиһиилээхтик ыытыаҕын эрэннэрдэ, аммаларга үрдүк таһымнаах спортивнай күрэхтэһиини тэрийбиттэригэр махтанна.
2026 сыллаахха диэри Бүлүү куоратыгар хас да спорт эбийиэктэрин тутуу барылга сылдьарын санатыахха сөп. Оччоҕуна барыта сатаннаҕына, Саха сиринээҕи параолимпиада саҥа эбийиэктэргэ ыытыллыан сөп.
Аммаҕа доруобуйаларынан хааччахтаах дьоҥҥо тэриллибит «Дьулуур» спартакиада үөрүүлээхтик сабылынна.
Николай Куприянов.