Мин, сэрии сылын оҕото, үлэ бэтэрээнэ, баһылыктарбыт дьоннорун кыһалҕаларын өйдүөхтэрэ диэн суруйан эрэбин.
Ол курдук билигин Дьокуускайга диэри суол оҥоһуллан, тупсан турар. Ол эрээри киһи барыта массыыналаах буолбатах. Биһиэхэ колледж баар буолан устудьуон да, Дьокуускайга барар кыһалҕалаах дьон да куруутун элбэх.
Онон баһылыктарбыт бу баар кыһалҕалары өйдөөн, саатар нэдиэлэҕэ биирдэ, күн аайы буолбатын ээ, Бүлүүттэн Дьокуускайга диэри автобус сырыытын олохтуохтарын сөп этэ. Суолга харах тэстэринэн айанныыр таксиларынан сылдьыахтааҕар автобуһунан дьон-сэргэ удамыр сыанаҕа барыа-кэлиэ этэ. Автобус тохтууругар анаан Дьокуускай суолун төрдүгэр автовокзал дьиэтэ урут тутуллан испитэ. Онон баһылыктар дьоҥҥутугар утары баран, биһигиттэн Дьокуускайга бастайааннай сылдьар автобус сырыытын олохтуо этигит. Оччоҕуна устудьуон оҕолорбут, дьон-сэргэ автобус өҥөтүнэн туһанан улаханнык абырыаныа, айан суолун кытыытыгар олорор нэһилиэктэр олохтоохторо эмиэ туһаныа этилэр. Оччоҕуна биһиги, бүлүүлэр, бэйэбит автобуспутунан сылдьыа этибит.
Мин этиибин дьон өйүө дии саныыбын. Дьон айаҥҥа наһаа эрэйи көрдө. Онон Бүлүү-Дьокуускай хайысхатынан автобус сырыыта олохтонуо диэн эрэнэбин.
Дмитрий Яковлев,
сэрии сылын оҕото, үлэ бэтэрээнэ.