“Туймаада” стадиоҥҥа “Азия оҕолоро” VIII аан дойдутааҕы оонньууларын үөрүүлээх арыллыытыгар Бүлүү улууһуттан быстах байыаннай дьайыы кыттыылаахтарын оҕолоро уонна бииргэ төрөөбүттэрэ астына сырыттылар, тэрээһини сэргээтилэр.
Кинилэргэ умнуллубат үөрүүлээх түгэни Бүлүү улууһун дьаһалтата бэлэхтээтэ. Спорт управлениетын салайааччы Ольга Калачикова-Яковлева билиһиннэрбитинэн, улуус дьаһалтата СВО кыттыылаахтарын оҕолорун, бииргэ төрөөбүттэрин “Азия оҕолоро” VIII аан дойдутааҕы оонньууларын үөрүүлээх арыллыытыгар, түмүктэниитигэр босхо сырытыннарарга эрдэттэн 20-чэ билиэттэри атыыласпыт.
СВО-ҕа икки убайа сылдьар устудьуон Изабелла Андреева үөрүүлээх түгэнин бу курдук үллэһиннэ:
-Мин билигин Дьокуускайга баарбын, үөрэнэбин. Бүлүү улууһун дьаһалтатын үлэһиттэрэ “Азия оҕолоро” оонньууларын арыллыытын көрөргө босхо билиэттэри биэрэллэрин эппиттэрэ. Киириигэ Ольга Калачикова-Яковлева биһигини кэтэһэн, билиэттэрбитин туттарбыта.
Мин аттыбар икки кыыс уонна икки уол олорбуттара. Оҕолор наһаа астыннылар, умнуллубат түгэннэри өйдүү-саныы сылдьарга төлөпүөннэринэн хаартыскаҕа түһэртээбиттэрэ.
Мин наһаа үчүгэйдик сылдьан кэллим, астыныы бөҕөтө. Үчүгэй күнү бэлэхтээбиккитигэр барҕа махталбын тиэрдэбин!
* * *
Ити курдук, Бүлүү улууһун, муниципальнай тэриллиилэр дьаһалталара быстах байыаннай дьайыы кыттыылаахтарын дьиэ кэргэннэригэр элбэх көмөнү оҥороллорун бэлиэтиир тоҕоостоох. Кинилэр оҕолорун, бииргэ төрөөбүттэрин улахан тэрээһиҥҥэ сырытыннарыы биир түгэн эрэ буолар.
Николай Куприянов.