Аҕыйах хонугунан Дьокуускай куоракка саҕаланыахтаах күүтүүлээх VIII норуоттар икки ардыларынааҕы «Азия оҕолоро» спортивнай оонньууларга Бүлүү улууһуттан төһө элбэх эдэр спортсмен уонна ханнык көрүҥнэргэ кыттар буолбуттарын туһунан «В.Г.Румянцев аатынан Бүлүүтээҕи оҕо спортивнай оскуола» дириэктэрэ Георгий Осипов билиһиннэрдэ:
— Быйылгы сыл сүрүн спортивнай күрэхтэһиитигэр — «Азия оҕолоро»VIII спортивнай оонньууларга Бүлүү улууһуттан 6 көрүҥҥэ «В.Г.Румянцев аатынан Бүлүүтээҕи оҕо спортивнай оскуола» иитиллээччилэрэ, барыта 9 спортсмен кыттыыны ылыахтара.
Көҥүл тустууга Бүлүүкуорат 1 №-дээх оскуолатын 8 кылааһын үөрэнээччитэ Пантелеймон Софронеев, чэпчэки атлетикаҕа Бүлүүтээҕи гимназия 8 кылааһын үөрэнээччитэ Владислав Данилов, куорат 1 №-дээх оскуолатын 8 кылааһын үөрэнээччитэ Андрей Буслаев, мас-рестлиҥҥэ эмиэ ити оскуола 8 кылааһын үөрэнээччилэрэ Рашид Мусин уонна Ренат Николаев, кикбоксиҥҥа Халбаакы оскуолатын 9 кылааһын үөрэнээччитэ Аман Иванов, куорат 2 №-дээх оскуолатын 9 кылааһын үөрэнээччитэ Айаал Поскачин, тхэквандоҕа эмиэ ити оскуола 9 кылааһын үөрэнээччитэ Рудольф Дорофеев, оҕунан ытыыга «Р.М.Дмитриев аатынан Олимпийскэй эрэл» оскуолатын 9 кылааһын үөрэнээччитэ Самсон Спиридонов кыттыахтара.
Эдэр спортсменнарбыт бэйэлэрин көрүҥнэригэр өрөспүүбүлүкэ күүстээх спортсменнарын ахсааннарыгар киирэллэр, элбэх таһымнаах күрэхтэһиилэр кыайыылаахтарынан, призердарынан буолаллар. Кинилэр билигин күүстээх сүүмэрдиир сбордары ааһа сылдьаллар.
Аан дойдутааҕы таһымнаах күрэхтэһиилэргэ эдэр кэскиллээх спортсменнарбытыгар ситиһиилэри баҕарыахха!
Николай Куприянов.