«Азия оҕолоро» оонньууларга Саха сирин I хамаандата 25 кыһыл көмүс мэтээли ыларыгар Айал Поскачин кылаата эмиэ баар. Биир күн икки Бүлүү улууһуттан төрүттээх кикбоксердар Аман Иванов уонна Айаал Поскачин кыһыл көмүс мэтээллэри ылары ситиһэн биир дойдулаахтарын, Саха сирин спорду таптааччыларын үөрдүбүттэрэ.
Олох көрдөрөрүнэн үлэтигэр бэриниилээх, билиилээх-көрүүлээх, оҕолорго сыһыаннаах, сыал-сорук туруорар, оҕо туругун, доруобуйатын көрөн дьарыктыыр тириэньэр баар сиригэр элбэх ааттаах-суоллаах спортсменнар үүнэн тахсаллар. Биир оннук киһинэн Бүлүүтээҕи В.Г.Румянцев аатынан оҕо спортивнай оскуолатын тириэньэрэ Георгий Халабышев буолар.
Кини Бүлүүгэ олохсуйан, оҕолору эрчийэн барыаҕыттан Бүлүү эдэр кикбоксердара Саха сиритэн саҕалаан Арассыыйаҕа тиийэ таһымнаах күрэхтэһиилэргэ баран киирсэр, кыайар-хотор буоллулар. Кини биир ситиһиилээх иитиллээччитинэн быйылгы «Азия оҕолоро» VIII аан дойдутааҕы спортивнай оонньууларын кикбоксиҥҥа 54 киилэ ыйааһыҥҥа чемпиона Айал Поскачин буолар.
— Бастаан Уһук Илин, онтон Урал федеральнай уокуруктар хамаандаларын уолаттарын кытта киирсибитим. Бастакы киирсии ыарахан этэ, уһун уҥуохтаах уол дистанцияттан үлэлиирэ, киирэргэ уустук да буоллар, үс раунд тухары сылайдар да, киир да киир буоламмын кыайбытым.
Спорт кикбоксинг көрүҥүнэн дьарыктаныы кырабыттан баҕарар баҕа санаам этэ, телевизорга куруук профессионаллар киирсэллэрин көрөөччүбүн, кинилэр курдук буолуохпун баҕарарым. Оннооҕор кыра сылдьан кикбоксер буолан оонньооччубун.
Оскуолабытыгар Георгий Владимирович кэлэ сылдьан оҕолору кикбоксиҥҥа дьарыктанарга ыҥырбытыгар, тутасөбүлэһэн барбытым. Нэдиэлэҕэ 5-6 эрчиллэбин, күрэхтэһиилэргэ утарылаһааччыларбын кытта киирсиини эрдэттэн былаанныыбын, — диэн «Азия оҕолоро» оонньууларын кикбоксиҥҥа чемпиона Айал Поскачинхайдах кыттыбытын, кикбоксинынан дьарыктаныыны саҕалаабытын кэпсээтэ.
Кини саамай сөбүлүүр хоббилара кикбоксинг уонна… уруһуйдааһын. Айал, бэл, кыраасканан кытта уруһуйдуур эбит.
Айал Поскачин төрөппүттэрэ Валентина Дмитриевна уонна Алексей Анатольевич уоллара спордунан дьарыктанарын өйүүллэр. «Азия оҕолоро» VIII аан дойдутааҕы спортивнай оонньуулар кикбоксиҥҥа киирсиилэрин кэлэн көрбүттэрэ, уолларын өйөөбүттэрэ!
— Айал 5 кылаастан кикбоксиҥҥа эрчиллэр, күрэхтэһиилэргэ сыыйа-баайа кыттан барбыта. Элбэх күрэхтэһиигэ кыттан уопутуран, элбэхтик үлэлээн ситиһиилэннэ.«Азия оҕолоро» VIII аан дойдутааҕы спортивнай оонньууларга элбэх сыллаах үлэтин түмүгэ көһүннэ,күүстээх санаатын, дьулуурун көрдөрөн чемпион үрдүк аатын ылла.
Кини бастаан лоу-кик көрүҥҥэ киирсэрэ, хаста даҕаныөрөспүүбүлүкэҕэ бастаабыта,Уһук Илин федеральнай уокуругар миэстэлэспитэ, Арассыыйаҕа киирсибитэ, онтон «Азия оҕолоругар» бастаата. Быйылгы сыалбытын-сорукпутун ситтибит, өссө да элбэх сыал баар, көстөн иһиэ, — диэн Георгий Халабышев кэпсээтэ.
Ити курдук, Айал Поскачин «Азия оҕолоро» VIII аан дойдутааҕы спортивнай оонньууларын кикбоксиҥҥа чемпиона буоларыгар туруоруммут сыалын-соругун толорорго дьулуура, элбэх күрэхтэһиини ааһан уопутурбута, тулуура, күүстээх санаата күүс-көмө буоллулар.
Николай Куприянов.