Тохсунньу 30 күнүгэр И.М.Гоголев аатынан Чочу орто оскуолатыгар иккис төгүлүн ыытыллар улуустааҕы «Барҕарыы» научнай-практическай конференция буолан ааста. Уопсайа 14 оскуолаттан сүүсчэкэ оҕо кыттыыны ылла.
Бу ааҕыылар хайысхалара барыта уу сахалыы тылынан тыыннанан тэрилиннэ. Сүрүн сыал-сорук — саха оҕото сахалыы тылынан ыраастык саҥарыахтаах, санаатын көҥүллүк төрөөбүт тылынан этиниэхтээх.
Бииртэн биир сэргэх, саҥалыы хайысхалаах үлэлэр тахсан эрэллэрэ киһини үөрдэр. Сахалыы ыраастык саҥарар, санааларын этинэр оҕолор киһи эрэ кэрэхсиэҕин курдук туттан-хаптан туран кэпсииллэрэ, саха ыччата кэскиллээҕин кэрэһэлиир.
Д.А.Гуляев аатынан Кыргыдай орто оскуолатыттан сэттэ оҕо баран кыттыыны ылан үөрүүлэрэ үрдүк. «Кыраайы үөрэтии» хайысхаҕа — Кырбасов К.(11 кыл) — 3 м., «Айылҕаны чинчийии» — Изиева К. ( 5 кыл.) — 1м., Наумов С.( 5 кыл.) — 2м., «Литэрэтиирэ» — Игнатьев Э.( 5 кыл.) — 2м., «Уйулҕа» — Николаева Д. (10 кыл.) — 1 м., «История» — Степанова Ю.( 6 кыл.) — 3м.
Ону тэҥэ саха тылын уонна литэрэтиирэтин учууталларын түмэр, сахалыы тыыннаах төгүрүк остуол буолла. Түмсүү сүрүн сыала — саха тылын сайыннарыы, төрөөбүт төрүт тылынан саҥарар оҕолору иитэн-үөрэтэн таһаарыы.
Лөкөчөөнтөн, Чочуттан, Тааһаҕартан олус интэриэһинэй хайысхалаах үлэлэри кэпсээтилэр — бу барыта үөрэхтээһин саҥа сүүрээннэрин кытта ыкса сибээстээх. Тааһаҕар орто оскуолата » Оҕону сахалыы тиһиккэ киллэрэн олоҥхо нөҥүө иитии-үөрэтии» диэн Эркээйи бырагырааматыгар олоҕуран улахан бырайыагынан үлэлиирин бары сэргии иһиттибит. Директор Капитон Петрович кулун тутар ыйга ити тиһиккэ олоҕуран улахан тэрээһин буоларын иһитиннэрдэ.
Ааҕыы кыттыылаахтара И.М.Гоголев аатынан Чочутааҕы түмэлгэ сылдьан, билиилэрин хаҥаттылар. Маннык сахалыы тыыннаах ааҕыылар төрөөбүт тылынан ыраастык саҥарар, толкуйдуур, ырытар ыччаттар үүнэн тахсалларыгар олук буолар.
Саха оҕото! Сахалыы тылынан саҥар! Саха буолан сандаар!
Василиса Окоемова, Кыргыдай.