Россияҕа дьиэ кэргэн, Саха Өрөспүүбүлүкэтигэр Оҕо саас, Сунтаар улууһугар Аҕа саастаах дьоҥҥо ытыктабыл сылларыгар Кэмпэндээйи нэһилиэгин “Тымтайдаах” сиригэр Үрүҥ тунах ыһыахха Сунтаар улууһугар биллэр баянист, ырыаһыт, ырыа айааччы, Кэмпэндээйи нэһилиэгин бочуоттаах олохтооҕо, РСФСР үөрэҕириитин бэтэрээнэ, учуутал Егор Гаврильевич Спиридонов аатынан “Баян нарын иэйиитинэн…” диэн Бүлүү бөлөҕүн оройуоннарын иһинэн бэс ыйын 29 күнүгэр ыытыллыбыт баянистар күрэхтэригэр кытынныбыт.
Бүлүүттэн СӨ транспорын үтүөлээх уонна бочуоттаах үлэһитэ, Саха сирин авиациятын бэтэрээнэ, ырыа айааччы-мелодист, ырыаһыт, баянист Виктор Николаевич Платонов кыттан Гран-при аатын ылан, 50 тыһ. харчынан бириэмийэлэннэ. Мин баянист Виктор Платоновка ырыаһыт быһыытынан баран кэллим.
Бу күн сарсыардаттан Тымтайдаахха олус үчүгэй ыһыахха сылдьан, алгыс иҥэриннибит. Арыылаах алаадьынан, үчэһэлээх этинэн, кыынньа сылдьар кымыһынан айах туттулар. Онтон күнүс 3 чаастан күрэхпит саҕаламмыта. Ол иннинэ Тымтайдаах ыһыахтыыр сиригэр баянист Егор Гаврильевич Спиридонов аата иҥэриллэн мемориальнай дуосканы аһыы үөрүүлээх быһыыга-майгыга ыытыллыбыта. Кэмпэндээйи нэһилиэгин баһылыга, кэргэнэ, балта, ыалдьыттар тыл эппиттэрэ. Чахчы да учуутал, ырыаһыт, баянист Егор Спиридонов үлэлээбит үлэтин сыаналаан, төрөөбүт сиригэр аатын иҥэрбиттэрин ыһыах кыттыылаахтара дохсун ытыс тыаһынан доҕуһуоллаабыттара.
Ити кэнниттэн баянистар жеребьевка бэрээдэгинэн, түһүмэх аайы дохсун ытыс тыаһыгар доҕуһуоллатан, бэйэлэрин талааннарын арыйбыттара үөрүүлээх, долгутуулаах этэ. Чаҕылхай күннээх халлаан уруйдуу көрсүбүтэ. Салгыы дьүүллүүр сүбэ үлэлиир кэмигэр баянистар бары үҥкүү түһүмэҕин доҕуһуоллаабыттара. Фокстрот, тустеп, вальс уо.д. а. оонньообуттара. Ырыаһыттар бары урукку ырыалары ыллаан, дьону үҥкүүлэппиппит. Ыалдьыттар баянынан үҥкүүлээн дуоһуйа сынньаммыттара, өссө бастыҥ үҥкүүһүттэргэ бириэмийэ бэриллибитэ үөрүүлээх этэ. Дьүүллүүр сүбэҕэ кэргэнэ Олимпиада Спиридонова, “Сайдыы” кулууп дириэктэрэ Анна Тотонова, балта Елизавета Гаврильевна үлэлээбиттэрэ.
Виктор Платонов бастакы түһүмэҕэр мин “Ийэбэр” диэн А.Барашкова тылларыгар, матыыбыгар ырыаны толорбутум, иккис түһүмэххэ баяҥҥа “Серенадалары”оонньообута, үһүскэ Виктор Николаевич бэйэтэ айбыт “Эҕэрдэ, эйиэхэ тапталлаах куоратым” диэн ырыатын толорбута. Көрөөччүлэр дохсун ытыс тыаһынан уруйдаабыттара.
Ырыаһыттарга махтал сурук, Олимпиада Спиридонова хоһооннорун кинигэтин бэлэхтээбитэ уонна миэхэ музыкам музейыгар баянист Егор Спиридонов статуэткатын бэлэхтээн, үөрүү көтөллөөх кэллим.
Түмүккэ кыайыылаахтарынан буоллулар: 1 дипломант — Егор Третьяков, Кутана, Сунтаар — “Камелек” иһит набора. 2 дипломант-Александр Степанов, Күндэйэ, Сунтаар — иһит набора. 1 лауреат — Клара Тихонова, Тойбохой, Сунтаар — 15.000 бириэмийэ. 2 лауреат — Афанасий Евсеев, Сунтаар — 10.000 бириэмийэ. 3 лауреат — Тимофей Шестаков-Чоххуруос, Ньурба — 5.000 бириэмийэ.
Онтон киэһэ икки көлүөнэ Фрументий, Нина Софроновтар, Дуолан, Анита Трофимовтар бэртээхэй кэнсиэртэрин көрдүбүт. Ол кэнниттэн кулууп дириэктэрэ Анна Тотонова туруорсан туттарбыт саҥа кулуубун биһиэхэ ыалдьыттарга анаан көрдөрөн, кэпсээбитин дуоһуйа сэргээтибит.
Күрэх үрдүк тэрээһиннээхтик ыытылынна диэн сыаналыыбыт. Бүлүү эбэ үрдүгэр ырыа дьүрүскэнигэр кыттыһан, үөрүү-көтүү үктэллээх, үчүгэй сонуннаах дойдубутугар кэллибит.
Виктор Николаевич, үрдук кыайыыгынан өссө төгүл эҕэрдэлиибин! Күрэххэ кыттыбыт бука бары баянистары, ырыаһыттары ситиһиигитинэн эҕэрдэлиибин! Ити курдук баян доҕордоох, ырыа-тойук аргыстаах, олох устун этэҥҥэ айаннатан иһиэҕиҥ диэн алгыыбын.
Кэмпэндээйигэ биһигини көрсөн хоннорбут, аһаппыт дьиэ хаһаайкатыгар Любаҕа улахан махталбытын тириэрдэбит. Амарах санаалаах, үөрүнньэҥ киһиэхэ күн сирин үтүөтүн аныыбыт.
Матрена Сивцева.