Барыта Кыайыы туһугар. Улуус бэтэрээннэрин Сэбиэтигэр анал байыаннай дьайыыга көмөнү оҥорууга 2024 сылга отчуоттуур түмүктэр оҥоһулуннулар.
Ахсынньы 30 күнүгэр “Бүлүү Харысхал” волонтердарын Дьокуускайтан сылдьар Ресурснай добровольческай киин салайааччыта Айыллаан Васильевич Винокуровы уонна улуустааҕы бэтэрээн Сэбиэтин бэрэссэдээтэлин Федор Федорович Николаевы кытта көрсүһүүлэрэ буолбута. Бу сылбыт Ийэ дойдуну көмүскээччилэр сылларынан биллэриллэн, тохсунньу 22 күнүгэр бэтэрээннэр Сэбиэттэрин Пленумугар Үс Герой килбиэннээх албан ааттарын өрө тутан туран, үлэбит торумун бигэргэттибит.
Нэһилиэктэр бэтэрээннэрин Сэбиэтин уонна олохтоох дьаһалталарын сатабыллаах салайыыларынан бэтэрээннэр сүрэхтэрин баҕаларынан, илиилэрин сылааһынан, арчылыыр-амаҕаччылыыр күүстэринэн элбэх да харыстыыр, хаххалыыр сиэккэлэр, дьыл араас кэмнэригэр сөп түбэһиннэрэн, баайылыннылар, Кыайыыны чугаһатан элбэх киһини сомоҕолуу түмтүлэр.
Бэтэрээн Сэбиэтин бэрэссэдээтэллэриттэн Сортоева Раиса Павловна (Чинэкэ) саамай элбэх улахан харыстанар сиэккэлэри баайбыт нэһилиэкпит буолар. Гоголева Галина Алексеевна (Чочу) сиэккэ матырыйаалыгар олунньу ыйга 78000 хомуллубутугар саамай элбэх сууманан көмөнү оҥорбут нэһилиэкпит, аҥардас Кыадаҥдата 20000 хомуйан ыыппыта төһүү күүс буолла. Трофимова Ольга Васильевна (Бөкчөҥөө), эмтээх отторунан И.П.Прокопьева-Отоһут Өрүүнэ куту чөллүүр утаҕынан уонна ыарыыны мүлүрүтэр маастарынан Р.Н.Петрова “Көлүкэчээн” түмсүүтэ көмөнү оҥорон, эмтээх оттору ыытар нэһилиэкпит, Мандарова Феодосия Алексеевна (Өкүндү) сиэри-туому толорорго олунньу ыйга, бастакы ууруна суруктаах мөһөөччүктэри тикпит, от ыйыгар ыыппыт баһыылкаларга Өкүндү бэтэрээннэрин көмөлөрө көмүөл күүһүнэн биллибитэ, Кырбасова Павлина Дмитриевна (Кыргыдай) сиэлинэн оноһуктара, харыстыыр сиэккэлэри баайыыта, Еремеева Оксана Христофоровна (Хаҕын), Васильева Клара Петровна (1 Күүлэт) бастакы рулон матырыйаалларбытыгар, илим сетката ылылларыгар көмө харчытын бастакынан хомуйбут уонна илиилэрин сылааһынан сыл устата баайан ыыппыт нэһилиэктэрбит буолаллар.
Баһылыктарбыт көмөлөрүнэн
Бороҕон баһылыга Иванов Андрей Иннокентьевич 2022 сыл алтынньы ыйга бастакы хомуур саҕана Уссурийскай байыаннай чаастарга айаммытыгар бэйэтин Бороҕонун уолаттарыгар көмөтүн оҥорон, Владивостокка көтөрбүтүгэр авиапорка көмөлөһөн атаарыаҕыттан ыла күн бүгүнүгэр диэри нэһилиэк бэтэрээннэрин амаҕаччылыыр күүһүн ( баһыылка, маскисеткаҕа илим сеткатынан, эмтээх отторунан) уолаттарыгар ыыталлар. Үгүлээт нэһилиэгин баһылыга Октябрь Иванович Лукин эмиэ биир бастакынан уолаттарыгар көмөнү оҥорбут нэһилиэк буолар. Ордук тоҥ астарынан, копченай балыктарынан хааччыйарын уолаттарбытыгар барыларыгар аадырыстаан тириэрдэ сатыыбыт. 2 Күүлэт баһылыга Юрий Иванович Спиридонов муус устар ыйга, улуу сирдьиппит төрөөбүт күнүгэр, бастакы массыынанан ыытар баһыылкаларбытыгар күүстээх көмөнү онорбут нэһилиэкпит буолар. Илбэҥэ баһылыга Егор Афанасьевич Николаев саас этиҥ маһа түспүт маһынан хааччыйбыта, билигин да хас ыытар баһыылкаларбытыгар сиэр-туом мөһөөччүгэр “Айыыларым арчылааҥ!” диэн ууруна суруктаан, норуот маастара Иннокентий Акимов оҥорбут харысхалынан туомтуу баайан ыытабыт.
Олоҥхо декадатын чэрчитинэн ыытыллыбыт “Олоҥхо-олох алгыһа” А.М.Суханова-Күндүүнэҕэ аналлаах тэрээһиҥҥэ Тыымпы баһылыга Акимар Акимович Михайлов сиэр-туом мөһөөччүгүн уолаттарга алгыс анаан туомтуу баайан, бастакы Тоҕустарын акцияҕа кытыннарбыта. Лөкөчөөн баһылыга Доргонова Анна Владимировна рулонунан матырыйаал ылан, элбэх маскировочнай сиэккэни баайан ыыттылар, госпитальга сытар оҕолору аһынан-үөлүнэн хааччыйдылар. Балаҕаччы баһылыга Васильев Афанасий Васильевич Улуу добдурҕа кэмигэр тоҥ аһынан, куулунан балык киллэрэн, уолаттар Саҥа дьылы көрсө дойдуларын аһын амсайан, күүс киллэринэллэригэр үс массыынанан ыытыы тухары хааччыйан, Хабаровскайга баар госпитальга кытта көмөлөстүлэр.
Бүлүү к. бэтэрээннэрин түмсүүлэрэ
Куорат бэтэрээннэрин араас түмсүүлэрэ эмиэ элбэх өрүттээх көмөлөрө баһаам. В.О. Каратаев аатынан Олоҥхоһуттар уонна тойуксуттар коллективтара (сал. Иванова С.Т.) Москваҕа уонна Санкт- Петербурга баар госпиталларга бааһырбыт оҕолорго, Ростовка сүппүт оҕолору көрдөөһүҥҥэ барыы-кэлии харчытын бииргэ үөрэммит, 1978 сыллаахха оскуоланы бүтэрбит, билигин олоҕу салайсар туруу үлэһиттэри кытта хомуйан көмөлөстүлэр. 10 сылларын бэлиэтээбит “Ыллык” бэтэрээннэр түмсүүлэрэ (сал. Клавдия Ивановна Софронеева) Өймөкөөн Томторун сылгытын сиэлинэн элбэх харысхаллары оҥорон, уолаттарбыт хас биирдии роталарын дьонун хааччыйан, көмүскэл оҥордулар. Кыайыы вальсын кыайыылаахтара — “АйЛаана” бальнай үҥкүү ансаамбылын кыттыылаахтара (сал.С.Е.Зинурова) бастакы хомуурга барбыттары арчылааһынтан саҕалаан, үһүс сылларын уоттаах хонууга сылдьар уон уолга тепловизор, прицел, антидрон ылан ыыппыт акцияларбытыгар тиһигин быспакка көмөлөстүлэр, ордук Н.И.Парникова, Р.П.Гаврильева, Г.П.,Харлампьев, Р.Н. Петрова, Т.В. Фомина күүстээх көмөлөрүн бэлиэтиэххэ сөп.
Хомустаах микрооройуон олохтоохторо (депутаттар М.Г.Гаврильева, Н.С. Иванов) биллэрбит акцияларбытыгар илиилэрин сылааһынан Кыайыы туһугар эҥкилэ суох көмөлөрүн ыыталлар. Аҕа дойду сэриитин сылларын оҕолоро В.С.Николаев, А.С.Волков, М.Н.Иванова, С.П.Калачикова, К.М. Алампадистова, И.А. Волков бэйэлэрин кыахтарынан харчынан көмөлөрө барыбытын сөхтөрөр холобур буолар. Эбээ Баайа (Чочу), төһө да хараҕынан көрбөтөр, сылаас үтүлүк тигэн ыыппытын уолаттарбыт уларсыһа сылдьан туттан махтаналларын этэн долгуталлар.
Куорат бэтэрээннэрин илиилэрин сылааһынан туспа бөлөх тэринэн өрөбүлэ да суох харыстыыр сиэккэлэри баайдылар. М.П. Спиридонова, Л.И. Большакова, Ф.А. Мандарова, Е.А. Николаева, Л.Д.Иннокентьева, С.Н.Яковлева, А.В.Докторова, К.П.Глебова, Г.Н. Каратаева саас сайын тиһиги быспакка баайбыттара. Күһүҥҥү кэмҥэ М.И. Тимофеева, К.М. Семенова, В.Н. Харлампьева эрчимнээх илиилэригэр ылан сылы түмүктэстилэр. Илим биэрбит дьоннор Чемчоев Реворий Гаврильевич-Чөмчөө Уус (Бороҕон, Бүлүү куорат бочуоттаах олохтооҕо), Чинэкэттэн Николаев Валерий Афанасьевич, Иванов Айуол Михайлович, Тимофей Николаевич Иванов (улуустааҕы бэтэрээн Сэбиэтин бэрэссэдээтэлин солбуйааччы) хаста да биэрэн, илим харыстыыр сиэккэҕэ улахан көмө буолбуттара. Сосновкаҕа баар интернат үлэһиттэрин Сергина Изабелла Гаврильевна (профсоюз бэрэссэдээтэлэ) салайан, миэстэтигэр маскисеткалары баайан, хас сезон аайы хастыыны да туттардылар, харчынан көмөнү оҥоро тураллар.
Оҕолорбут бэтэрээннэргэ көмөлөстүлэр
Оҕолорбут бэтэрээннэргэ көмөлөрүн умнубаппыт. Ахсынньы ыйга А.В.Харлампьева, Бүтүн Арассыыйатааҕы “Навигаторы” бырайыак сүрүннүүр салайааччыта, “Үтүө санааланыы” талисманын онорторон, баһыылкаларга уган уоттаах хонууга ыыттылар. Олоҥхо дьиэтиттэн И.Л.Кондаков аатынан гимназия чугас буолан, оҕолор быыс буллулар да киирэн көмөлөһөллөр. 9б кылаас сал.Федорова А.Н., 10 Яковлева И.Н., 11 кылаастар сал.Афанасьева Н.А., Егоров Н.Н. бөлөхтөрүн иилээн-саҕалаан Игнатьева Светлана Степановна илдьэ сылдьан, бэтэрээннэргэ күүс-көмө буоллулар.
“КүнЭко” лааҕыр оҕото Лиза Архангельская быйыл Кириһиэнньэ аптаах уутунан эбэтин кытта арчылаан, сайын хомуйбут эмтээх отторун сиэр-туом мөһөөччүгэр уган ыытта. Тэрилтэлэр күүстэринэн оскуола иннинээҕи “Аленушка” оҕону сайыннарар киин үлэһиттэрэ сэбиэдиссэй М.Г. Гаврильева, Л.М. Софронеева сиэккэ баайыытын уонна көмө харчы хомуйуутун утумнаахтык ыыттылар. ДЮСШ (дириэктэр Осипов Г.Д.), музей үлэһиттэрэ (дириэктэр Афанасьева Т.Н.), төрөппүт көрүүтэ суох хаалбыт оҕолору көрөр Бүлүүтээҕи киин үлэһиттэрэ (Дашевскай Е.А.) кэмиттэн кэмигэр кэлэн көмөлөстүлэр. Г.С.Донской аатынан 2№-дээх оскуола оҕолорун бастакы кылааһын оҕолоро волонтер үлэтин анаан-минээн кэлэн билсиһэн, саҥа сылы саллааттар минньигэһинэн көрүстүннэр диэн аҕалан туттарбыт кэһиилэрин, ахсынньыга бастакы массыына барыытыгар уган ыыппыппыт, оруобуна Саҥа дьыл иннигэр тиийэн уолаттар тутан махтаннылар. Н.Г.Чернышевскай аатынан БППК бэтэрээннэрэ эмиэ тиһигин быспакка утумнаахтык көмөлөһөллөр. Көмө киинин салайааччыта М.Е.Оконешникова ордук Ирина Егоровна Петрованы, Иннокентий Романович Атласовы уонна 86 саастаах Екатерина Михайловна Иванованы киэн тутта, махтана ахтар.
Сыралаах үлэ түмүктэрэ
Улууспут үрдүнэн “Бүлүү Харысхал” волонтердарын хамсааһыннарынан Донбасс координационнай киинин отчуотугар 341 сиэккэ баайыллан уоттаах хонууга уолаттарбытыгар ыыппыт буоллахпытына, 150 маскисетканы баайыы Кыһыл Сыыр “Сила горячих сердец” бэтэрээннэрин түмсүүтүн (сал.Октябрина Прокопьевна Иванова) күүстээх көмөтө буолар. Бу отчуокка киирбитинэн, 6 481.474 кг баһыылкалары сыл устата уолаттарбытыгар ыыппыппыт «Якутия” авиакомпания дааннайдарынан уонна Донбасс биир кэлим координационнай кииннэринэн бигэргэтилиннэ. Маны таһынан Москва, Санкт- Петербург госпиталларыгар туспа оноһуллан 180 кг, Владивостокка массыынанан 160 кг барыыта буолар. Барыта “Бүлүү Харысхал” нөҥүө 6 821 474 анал баһыылкалар уоттаах хонууга уолаттарбытыгар туруктарын бөҕөргөтө ыытылыннылар. Бу барыта улууспут дьонун-сэргэтин Кыайыыга сыаната биллибэт үтүмэн үгүс суумалаах көмөтө буолар.
Тоҕус уол көрдөһүүлэринэн 1 334 950 волонтердабыт (Нифонова Ирина Васильевна, Ермолаева Сахая Семеновна, Корякина Александра Васильевна, Николаева Ольга Романовна, Софронеева Анастасия Романовна. Софронеева Любовь Мефодеевна, Колтовской Василий Андреевич) эрэллээх счеттарыгар харчы хомуллан, квадракоптер, тепловизор, прицел арааһа, антидрон, анализатор-детектор курдуктар ылыллан ыытыллыбыттарын, уолаттар тутан тыыннарын уһатан туһана сылдьаллар. Маны таһынан сүппүт оҕолору көрдөөһүҥҥэ, матырыйаал ылыллыытыгар 250000 суума хомуллубута. Көмөлөспүт бар дьоммутугар махталбыт муҥура суох, таптал, итэҕэл, эрэл буолар!
Норуот күүһүн түмэ тардан “Алгыс” НКК (дириэктэр Спиридонова А.П.) үлэһиттэрэ (Евсеева А.П.,Елена, Иван Туласыновтар, Иванова М.И., Менкяров Л.Г., Томскай Р.А., Иванов Р.Д., Иванов А.А. – Сомоҕо, Алексеева М. С.) бастакы хомуур 2022 с. саҕаланыаҕыттан дьаһайан-дьапсайан, профсоюзтарын бэрэссэдээтэлэ Иванова Светлана Тарасовна уҕараабат сатабыллаах салайыытынан “Бүлүү Харысхал” волонтердар хамсааһыннара тэриллэн, көмүөл күүһүнүү Кыайыыны кынаттыы уоттаах хонуу устун амаҕаччылыы-арчылыы көтөн, үһүс сылларын түмүктээтилэр. Иэйэхсит тыыныгар Ийэ дойдуну көмүскээччилэр сылларыгар үктэнэн баран, “Бүлүү Харысхал” номнуо үһүс акциябытын оҥорон тохсунньу ыйга тоҥ астары 100 оҕоҕо аадырыстаан 136 дьааһык анал баһыылка оҥорон ыыттыбыт. Хампа, Балаҕаччы, Үгүлээт балыксыттара куулунан собо биэрэн көмөлөстүлэр. Ыаллыы сытар улуустан биир уопсай военкоматтаах буоламмыт, Үөһээ Бүлүү СППК (дириэктэрдэрэ Тарасов Ю.Ю.) балыксыттара уон куул собо биэрэн, “Ыччат көмөтүн киинин” (сал.Оконешникова М.Е.) бэтэрээннэрэ ыһаарылаан көмөлөстүлэр.
«Бүлүү Харысхал» волонтердар хамсааһыннара Аҕа дойдуну көмүскээччилэр күннэрин көрсө дойду араас муннуктарыгар ыраас халлаан туһугар уоттаах хонууга сылдьар отут уолаттарбытыгар 31 дьааһыгы анал аадырыстаан илии сылааһынан ыыттыбыт. Иэйэхсит илгийэр тыыныгар киирэн баран тохсунньу ыйга барыта түөрт акцияны тэрийэн ыыттыбыт. 132 уолга анал аадырыстаан 169 дьааһык күүстэригэр күүс эбэ, дойду мүөттээх сириттэн бигэ тирэх буола, кыайыыны кынаттыы айаннаата. Көмөлөспүт бар дьоммутугар махтанабыт! Бары бииргэбит.
Дьэ, ити курдук бэтэрээннэрбит мындыр кыахтара дойду араас муннугар Ийэ дойдуларын көмүскүү сылдьар уолаттарбытыгар бигэ тирэх буолан, ыраас халлаан туһугар алгыстара ананыан ананна, амаҕаччылыыр күүстэрэ или-эйэни олохтуу, Кыайыыны кынаттыы көтүөн көттө. Бэтэрээннэрбит барахсаттар тускуну туһаайбыттарыгар махтаныаҕыҥ !
Тамара Фомина-Талбаана АЙ, бэтэрээн Сэбиэтин Президиумун чилиэнэ, оройуон Сэбиэтин 4-с ыҥырыытын дьокутаата. “Бүлүү Харысхал” волонтердар хамсааһыннарын үбүн эппиэттээх салайааччыта.