Бөтүҥҥэ «Знатоки природы»интеллектуальнай оонньуу буолла

6 төгүлүн ыытыллар «Знатоки природы» улуустааҕы интеллектуальнай оонньуу күрэҕэр Бүлүү улууһун 11 оскуолатын үөрэнээччилэрэ билиилэрин тургутуһан, Бөтүҥ орто оскуолатыгар кииннээн, хамаанданан күрэхтэстилэр.

Бырайыак автора — Бөтүҥ оскуолатын естествознаниеҕа учуутала Калачёв  Петр Серафимович. Манна айан ырааҕын аахсыбакка  Кыргыдайтан тиийэ кэллилэр.

Интеллектуальнай оонньуу Саха сиригэр Ойуур хаһаайыстыбата тэриллибитэ 85 сылыгар, Бүлүү улууһугар бастакы оскуола тэриллибитэ 195 сылыгар уонна Д.Г.Макаров аатынан «Зеленый пояс Вилюя»  экологическай фонданы төрүттээччи Прасковья  Гаврильевна Макарова аатыгар ананна.

Оонньуу кэмигэр Бүлүүтээҕи айылҕа харыстабылын инспекциятын эппиэттээх үлэһиттэрэ: Пантелеймон Софронеев, Саида Поскачина, Иван Петров, ойуур хаһаайыстыбатыттан Айал Харлампьев, фонда Сэбиэтиттэн Савва Степанов, фонда дириэктэрэ Ксения Поскачина дьүүллүр сүбэҕэ үлэлээтилэр.

Күрэхтэһии түмүгүнэн Кыргыдай оскуолатын хамаандата эрэллээхтик кыайда. Хамаандалар бары да бэлэмнээх буоланнар күрэхтэһии көрдөөхтүк, тыҥааһыннаахтык барда.

Ураты харыстанар сирдэри көрөр-харайар департамент госинспектордара Иван Петров, Андрей Яковлев  күрэхтэһии кыттыылаахтарыгар анаан «Саха сирин көтөрдөрө» уонна «Ыраас уу» туһунан икки эко-уруок ыыттылар. «Зеленый пояс Вилюя» фонда дириэктэрэ Ксения Поскачина Д.Г.Макаров аатынан Дендропарк уонна фонда үлэтин кэпсээтэ.

Андрей Яковлев-Чуос, ООПТ госинспектора.

Читайте дальше