Үтүө аатын үйэтитии. Дмитрий Винокуров сырдык кэриэһигэр баскетбол күрэхтэһиитэ элбэх хамаанаданы бииргэ түмтэ. Г.И. Чиряев аатынан Бүлүүтээҕи 1 №-дээх оскуолатыгар улуус оскуолаларын иһинэн баскетболга күрэхтэһии буолла. Бу күрэхтэһии оскуолабыт 2021 с. выпускнигар, баскетболга Бүлүү улууһун хас да төгүллээх чемпионугар, өрөспүүбүлүкэ призерыгар, анал байыаннай дьайыы кыттыылааҕар Винокуров Дмитрий сырдык кэриэһигэр ананна.
Билиҥҥи кэм геройа, Дмитрий оскуолаҕа үөрэнэ сылдьан баскетболунан утумнаахтык дьарыктаммыта. Оскуола, улуус чиэһин өрөспүүбүлүкэҕэ элбэхтик көмүскээбитэ. Дима «Бастыҥ оонньооччу», «Бастыҥ нападающай» диэн анал ааттар кыайыылааҕа этэ.
Кини 2023 сыл бэс ыйын 4 күнүгэр анал байыаннай дьайыыга кытта сылдьан, тэҥэ суох киирсиигэ Запорожскай уобаласка сырдык тыына быстыбыта. Россия Федерациятын Президенин дьаһалынан “Эр санааланыы” уордьанынан наҕараадаламмыта.
Бу улахан тэрээһин чуумпуран туран Дмитрийы кэриэстээһинтэн саҕаланна. Оскуолабыт Е.В.Хрунов аатынан аэрокосмическай 11 “а” кылааһын Мусин Амир хамандыырдаах, байыаннай-патриотическай күрэхтэһиилэр кыайыылаахтара кэккэлии хаамыыны көрдөрдүлэр. Диманы чиэстээн тэриллибит баскетбол күрэхтэһиитигэр 9 оскуолаттан 16 хамаанда кытынна. Баппаҕаайы, Кыргыдай, Дьөккөн, Хампа, Халбаакы, Бүлүүтээҕи гимназия, 1,2,3 нүөмэрдээх оскуолалар. Күрэхтэһии кылаабынай судьуйатынан Кононов Д.Л. уола үлэлээтэ.
Баскетбол күрэхтэһиитин ыалдьыттара улуус баһылыгын солбуйааччы А.А. Прокопьев, Бүлүү куоратын баһылыга Я.А.Попов, Росгвардия Бүлүүтээҕи филиалын начальнига А.Н. Константинов, Дима ийэтэ В.В. Винокурова, кылаас салайааччыта М.И.Федорова тыл эттилэр. Бу олус суолталаах күрэхтэһии буоларын спортсмен оҕолор бары бэлиэтииллэр, кыайыылаах буолуу – улахан чиэс. Кыахтаах утарылаһааччылар мустаннар Дмитрий сырдык кэриэһигэр бэйэлэрин убаастабылларын биллэрэн күөн көрүстүлэр. Күрэхтэһии олус тыҥааһыннаахтык барда. Икки күн күүрээннээх киирсии түмүгүнэн кыайыылаахтарынан буоллулар: 1 миэстэни- Бүлүүтээҕи гимназия, 2 миэстэни — Г.И.Чиряев аатынан 1 №-дээх оскуола, 3 миэстэни Г.С. Донской аатынан 2 №-дээх оскуола спортсменнара ыллылар. Бу кыайбыт хамаандаларга Дима төрөппүттэрэ уонна аймахтара “IRON” маҕаһыынтан 30000, 25000, 20000 суумалаах сертификаттары туттардылар. Чаҕылхай оонньооччуларга анал ааттар ааттаннылар: “Бастыҥ оонньооччу” анал аат — Тутукарова Сайаана, Протопопов Денис (гимназия), “Бастыҥ нападающай”- Гоголева Надя (2-с оскуола), Петров Ганя (1-кы оскуола), «Бастыҥ защитник” — Яковлева Рада (Илбэҥэ), Чирков Витя (Хампа), “ Инникилээх оонньооччу”- Александрова Эвелина (Кыргыдай), Васильев Андриан (3-с оскуола). Маны таһынан эбии күрэхтэһиилэргэ хоппуттар: “Штрафной бросок”- Данилова Мичийээнэ (Илбэҥэ), «Трехочковые броски”- Григорьев Камиль (1-кы оскуола). Кыайыылаахтар бары сыаналаах бэлэхтэри тутан үөрэн-көтөн тарҕастылар.
Бу тэрээһин сүрүн спонсордарыгар уонна партнердарыгар – Дима төрөппүттэригэр, аймахтарыгар, Бүлүү улууһун дьаһалтатыгар, Бүлүүтээҕи педагогическай-профессиональнай колледжка (дир. Алексеев И.И.), Ис дьыала отделыгар (Михайлов Ф.П.), Бүлүү улууһун бойобуой кыргыһыылар бэтэрээннэрин Сэбиэтигэр, Бүлүүтээҕи Росгвардия коллективыгар (Константиноа А.Н.), Бүлүү уонна Үөһээ Бүлүү байыаннай комиссариатыгар (Харлампьев С.Н), Үгүлээт нэһилиэгин дьаһалтатыгар (Лукин О.И.), Бүлүү куоратын уонна улууһун спорткомитеттарыгар, «Байдам» эргиэн киинигэр (Буслаев Т.А., Буслаева К.Х.), «Табун» эргиэн киинигэр (Иванов И. И.), ИП Николаев Ф. Н., ИП Майорова В.Д., СХПК «Сыа Бүлүү» (Кондратьев А.А.), оскуолабыт төрөппүттэрин кэмитиэтигэр, 11«а», 11«б», 11 «в» 2021с. выпуск кылаастарын төрөппүттэригэр, үөрэнээччилэригэр, Дима бииргэ оонньообут хамаандатыгар, Н. В., А. С.Поповтар дьиэ кэргэттэригэр, Дима тренеригэр Гоголев Д.Д., 1 №-дээх оскуола коллективыгар (дир. Степанова В.С.) — бука барыларыгар улахан махталбытын тириэрдэбит.
Хорсун буойун, эн үтүө ааккын дьаныардаах үлэҕэ, үөрэххэ, күрэхтэһиилэргэ бар дьонуҥ, оҕолор, ыччаттар киэн тутта, холобур оҥосто ааттыахпыт. Эйэлээх олох туһугар сырдык тыынын толук уурбут хорсун буойуммут Дима Винокуров аата мэлдьи биһиги сүрэхпитигэр хаалыаҕа.
Уйгулаана Прокопьева,
Г.И. Чиряев аатынан Бүлүүтээҕи 1 №-ээх оскуола үөрэнээччитэ.