Оҕолору патриотическай тыыҥҥа иитиигэ, дойдуну таптыырга, биир дойдулаах үлэ, сэрии геройдарынан киэҥ туттарга туһуланар «Герой паартата» диэн бырайыак дойду үрдүнэн бары оскуолаларга далааһыннаахтык ыытыллар. Хорсун быһыыны оҥорбут выпускниктар тустарынан үөрэммит оскуолаларын паарталарыгар сурук сыһыарыллар, «Геройдар паарталарыгар» бастыҥ үөрэхтээх, холобур буолар быһыылаах үөрэнээччилэр олороллор.
Бу күннэргэ Н.И.Афанасьев аатынан Бороҕон оскуолатыгар «Эр санааланыы» уордьан икки кавалердарыгар «Герой паарталара» ананна. Ити тэрээһин туһунан Бороҕон нэһилиэгин баһылыга Андрей Иванов кэпсээтэ:
— Биир паарта СВО-ҕа сылдьан геройдуу быһыыны көрдөрбүт Сергей Скрябиҥҥа ананна. Кини Бороҕон оскуолатын 1992 сыллаахха бүтэрбитэ, ИДьМ уорганнарыгар үлэлээбитэ, хантыраагынан Хотугу Кавказка байыаннай сулууспаҕа сылдьыбыта.
2022 сыллаахха сайын СВО-ҕа хантыраагынан барбыт буойун сэтинньи ыйга кыргыһыы толоонугар охтубутун кэннэ, киниэхэ геройдуу быһыытыгар «Эр санааланыы» уордьана иҥэриллэрин туһунан ыйаах тахсыбыта. «Герой паартатын» арыйыыга «Эр санааланыы» уордьан кавалерын ийэтэ, Бороҕоҥҥо өр сылларга биэлсэринэн үлэлээбит Лидия Михайловна кытынна.
Иккис паарта оскуоланы 1999 сыллаахха бүтэрбит Денис Сивцевкэ ананна. Кини оскуоланы бүтэрээт, Дьокуускайга үөрэххэ киирбитэ. Аммаҕа практикатыгар сылдьан, ууга түспүт икки кыыһы быыһаабыта, хомойуох иһин, бэйэтэ ууга былдьаммыта. Киниэхэ хорсун быһыытыгар 2001 сыллаахха «Эр санааланыы» уордьана иҥэриллэрин туһунан РФ Президенэ Владимир Путин ыйааҕа тахсыбыта.
Ити курдук, норуодунай учуутал, сэрии бэтэрээнэ Николай Иванович Афанасьев аатын сүгэр оскуолабыт байыаннай эпэрээссийэ кэмигэр уонна эйэлээх олоххо хорсун быһыыны көрдөрбүт выпускниктарыгар, «Эр санааланыы» уордьан кавалердарыгар икки «Герой паарталара» баар буоллулар.
Николай Куприянов.