Бүгүн, тохсунньу 28 күнүгэр, күн бастакы аҥарыгар улуус баһылыгын бастакы солбуйааччы Иван Евсеев салайааччылаах иккис бөлөх Бороҕон нэһилиэгэр улуус дьаһалтатын 2024 сыллааҕы үлэтин отчуотун туруорда.
Иван Евсеев отчуоттуур мунньахха ааспыт сылга улууска ыытыллыбыт үлэ сүрүн түһүмэхтэрин, элбэх кэрэ-бэлиэ түгэннэрин билиһиннэрдэ.
Мунньахха Бороҕон олохтоохторо электроэнергиянан бигэтик хааччыйыыны, уот бардаҕына суотабай сибээс үлэтин тупсарыыны, оскуола, балыыһа тутууларын, суолу оҥорууну туруорустулар. Итини сэргэ, ынах сүөһү төбөтүгэр көрүллэр субсидия кээмэйин ыйыталастылар.
Иван Евсеев Саха өрөспүүбүлүкэтигэр 2027 сылга диэри саҥа тутуу ыытыллыбат буолбутун, үөрэх управлениетын салайааччытын солбуйааччы Наталья Филиппова Бороҕон оскуолатын тутуу улуус уочаратыгар 6-нан, өрөспүүбүлүкэҕэ — 103-нэн турарын быһааран биэрдилэр. Уотунан бигэтик хааччыйарга кэлэр сайын Бүлүүтээҕи РЭС бөһүөлэккэ СИП боруобат ситимин таҥыахтааҕа этилиннэ.
Быйыл улууска ынах сүөһү төбөтүгэр субсидия, үүт туттарыытыгар үбүлээһин көрүллэрэ бэлиэтэннэ.
Елена Мальцева оҕо уһуйаанын дьиэтигэр үгүөрү суумалаах өрөмүөн ыытыллыбытыгар, оҕолор сылдьалларыгар усулуобуйа биллэ тупсубутугар улуус дьаһалтатыгар, үөрэх управлениетыгар махтанна.
Ил Түмэн депутата, оройуоннааҕы киин балыыһа кылаабынай бырааһа Егор Григорьев балыыһа дьиэтин «Доруобуйа харыстабылын бастакы сүһүөх эбийиэктэрин уларытыы» бырагырааматыгар 2026-30 сылларга киллэриигэ ыытыллар үлэни, сотору кэминэн анаалыстары оҥорор тэриллэри аҕалан туруорууну, олунньуга балыыһа өрөмүөнэ саҕаланыаҕын, улууска доруобуйа харыстабылын саҥа эбийиэктэрин үлэҕэ киллэриини билиһиннэрдэ.
Николай Куприянов.