Ааспыт өрөбүллэргэ хапсаҕай дойдутугар — Үөһээ Бүлүүгэ аатырбыт хапсаҕайдьыт, буойун Баһылай Степанов-Буучугурас кэриэһигэр «А» категориялаах өрөспүүбүлүкэтээҕи турнир тэрилиннэ.
Өрөспүүбүлүкэтээҕи турнирга Саха сирин бастыҥ хапсаҕайдьыттара бары кытыннылар диэххэ сөп. Улахан интэриэһи 125 киилэҕэ диэри тустар Бурятия билиҥҥитэ бастыҥ бөҕөһө, көҥүл тустууга аан дойдутааҕы кылаастаах маастар, 2020 сыллаахха Европа боруонса призера, Арассыыйа чемпионатын призера Балдан Цыжипов кыттыыта тарта. Бүрээттэр тустууларыгар дойдутугар тэҥнээҕэ суох бөҕөс аны саха хапсаҕайыгар күүһүн холонон эрэр. Кини соторутааҕыта «Хаҥалас хапсаҕайын» абсолютнай кыайыылааҕын аатын сүкпүт киһи Буучугурас бирииһин ылаары Үөһээ Бүлүүгэ ааттаан-суоллаан кэллэҕэ…
Бүлүү улууһун хамаандата улахан турнирга ситиһиилээхтик кытынна. Ол курдук, эдэрдэргэ 62 кг ыйааһыҥҥа Михаил Семенов бэркэ тустан иккис бочуоттаах миэстэни ылла. Эр дьоҥҥо 57 киилэ ыйааһыҥҥа кэлиҥҥи кэмҥэ бэркэ тустар Федор Харлампьев үһүс үктэлгэ таҕыста. Саамай элбэх кыттааччылаах 65 кг Аскалон Федотов ыарахан хапсыһыылары ааһан иккис призер буолла. 85 киилэ ыйааһыҥҥа Радомир Григорьев боруонса мэтээли ылары ситистэ. Кини «Манчаары оонньууларын» гиирэ анььыытыгар чемпионката Анна Григорьева уола буолар.
85 кг Афанасий Матвеев уонна 95 кг Николай Николаев бэркэ тустаннар чемпион үрдүк аатын ыллылар.
— Турнир көбүөрүгэр түөртэ тахсан туһуннум, үс маастары кытта кииристим, финалга эт саастаах куруук тустар уолбун Чурапчыттан Анатолий Сивцеви кытта туһуннум, бүтэһик сөкүүндэлэргэ тэбэн кыайдым.
Бүлүү хапсаҕайдьыттарын хамаандата турнирга бэркэ тустубутун бэлиэтиэм этэ, оҕолор да аҕыйах буолан барбыттарын үрдүнэн бэркэ туһуннулар, — диэн билиһиннэрдэ чемпион Афанасий Матвеев.
95 киилэттэн үөһээ ыйааһыҥҥа финалга Никита Хабаров Балдан Цыжиповы кытта көрүстэ уонна кыайда. Бу тустууктар абсолютнай чемпион аатын былдьаһарга эмиэ көбүөргэ уун-утары турдулар. Бүрээт бөҕөһө атахха киирбитигэр саха ааттааҕа умасары тардан түһэрэн биир күн иккис кыайыытын ситистэ.
75 киилэ ыйааһыҥҥа диэри турнир абсолютнай кыайыылааҕынан «Хаҥалас хапсаҕайын» чемпиона Тимур Николаев ааттанна, эдэрдэргэ Кэбээйиттэн Эльдар Гуляев кыайыыны ситистэ.
Абсолютнайга чемпионакка биир интэриэһинэй хапсыһыынан бэтэрээннэргэ 80 киилэҕэ диэри чемпион Прокопий Петров уонна 90 киилэҕэ диэри чемпион Платон Саввинов көрсүһүүлэрэ буолла. Ыарахан ыйааһыннаах Платон Саввинов 2:0 ахсаанынан кыайыыны ситистэ.
Ити курдук, Буучугурас курдук улахан өрөспүүбүлүкэтээҕи турнирга Бүлүү хапсаҕайдьыттара бэркэ тустубуттарынан эҕэрдэлиэххэ!
Николай Куприянов.