Улахан күрэхтэһиилэргэ буулдьалаах саанан ытыыга улуус сүүмэрдэммит хамаандатын 6-с сылын бэлэмниир, оҕолору бэргэн ытыыга эрчийэр тириэньэр Анна Ивановаҕа быйылгы 2023 сыл үөрүүнү аҕалла. Кини хамаандата, үөрэнээччилэрэ өрөспүүбүлүкэтээҕи күрэхтэһиилэргэ бастаатылар, призер буоллулар.
Быйылгы сыл ситиһиилэрин улуус хамаандатын тириэньэрэ Анна Иванова бу курдук билиһиннэрдэ:
— Сайын Аммаҕа ыытыллыбыт «Дьулуур» спорт адаптивнай көрүҥнэригэр спартакиадаҕа биһиги хамаандабыт бастаабыта. Оскуола үөрэнээччилэрин спартакиадаларыгар бүлүүлэр хамаанданан үһүс буолбуппут. Бүлүү спортсмена Слава Иванов биирдиилээн бастыыр күрэхтэһиигэ чемпион буолбута.
2024 сыл сайын ыытыллар «Азия оҕолоро» аан дойдутааҕы оонньууларга кыттар кыахтаныахтара диэн былырыын буулдьалаах саанан ытыыга элбэх үгэстээх Бэрдьигэстээх спортивнай оскуолатыгар 4 оҕону ыыппыппыт. Бэрдьигэстээхтэн кыттар үөрэнээччим Афоня Егоров спартакиадаҕа паараҕа бастаабыта, биирдиилэн бастыыр күрэхтэһиигэ иккис буолбута. Ити курдук, улахан күрэхтэһиигэ икки үөрэнэччим миэстэлэспиттэрэ.
Спартакиадаҕа бэстилиэтинэн ытыыга Стас Максимов үһүс, паараҕа кини уонна Лиана Корякина үһүс буолбуттара.
Ахсынньы 17-24 күннэригэр ыытыллыбыт өрөспүүбүлүкэ чемпионатыгар кыттан кэллибит. Уолаттар буулдьалаах саанан ытыыга хамаанданан үһүс, бэстилиэтинэн ытыыга кыргыттар төрдүс буоллулар. Афоня Егоров «Азия оҕолоро» аан дойдутааҕы оонньууларга кыттыахтаах хамаандаҕа бастакы нүөмэринэн киирдэ, кини ахсынньыга Бэрдьигэстээххэ ыытыллыбыт күрэхтэһиигэ саҥа киирбит «финал-турнир» упражнениеҕа сааны оҥорбут киһи туруорбут супер-бирииһин ылбыта.
«Азия оҕолоро» аан дойдутааҕы ооньууларга Бүлүүттэн Стас Максимов резервэҕэ киирдэ.
«Чемпионнар баалларыгар» 2023 сыл бастыҥ 10 спортсменын иһигэр Чочуга олорор Мария Семеновна Догоюсова киирдэ. Кини быйыл бэтэрээннэргэ Арассыыйаҕа иккис миэстэлээх, Саха сиригэр бастыҥ ытааччылар ортолоругар сылдьар. Спорт бэтэрээнэ саанан ытыы сахалыы көрүҥэр — «Тииҥи» үс балаһыанньаттан ытыыга спорт маастара.
Николай Куприянов.