Бэс ыйын 5 күнүгэр Арассыыйа үрдүнэн Тулалыыр эйгэни харыстааһын күнэ – Эколог күнэ бэлиэтэнэр. Бүлүү улууһугар Д.Г.Макаров аатынан «Зеленый пояс Вилюя» экология пуондата тулалыыр айылҕаны харыстааһыҥҥа, эдэр ыччаты төрөөбүт айылҕаларын харыстыырга, билэргэ, ытыктыырга ситиһиилээхтик үлэлиир, элбэх араас өрүттээх тэрээһиннэри ыытар.
Ол курдук, соторутааҕыта – ыам ыйын 25 күнүгэр пуонда «Бүлүү өрүс күнүн» таһымнаахтык ыытта. Үгэс быһыытынан, бу күн «Ытык эбэҕэ сүгүрүйүү сиэрэ-туома», араас куонкурустар, экология викториналара ыытылыннылар. Бүлүү куорат кытылын ыраастааһыҥҥа көхтөөх субботник тэрилиннэ. Бу күн тэрээһин кыттыылаахтара саха үгэһинэн кус, алаадьы амсайдылар.
Хомойуох иһин, билигин биһиги кэккэбитигэр суох, элбэх саҥаны толкуйдаан киллэрбит, пуонданы ситиһиилээхтик салайбыт дириэктэр Прасковья Гаврильевна Макарова «Бүлүү өрүс күнүн» бэлиэтиир идиэйэтин куорат дьаһалтата, айылҕа харыстабылын иниспиэксийэтэ өйөөбүттэрэ. «Бүлүү өрүс күнэ» аан бастаан Бүлүү куоратыгар 2014 сыллаахха тэриллибитэ.
Итинтэн холобур ылан, ытык эбэлэри харыстыыр, ытыктыыр тэрээһиннэр Саха сиригэр тэнийбиттэрэ. 2017 сыллаахха Бүлүү бөлөх улуустарын экология форумнарыгар Бүлүү өрүс күнүн ыам ыйын 25 күнүгэр ыытарга быһаарыллыбыта. Билигин «Бүлүү өрүс күнэ» Бүлүү сүнньүгэр сытар улуустарга барыларыгар биир күҥҥэ бэлиэтэнэр буолла.
Эмиэ соторутааҕыта пуонда, Бүлүүтээҕи лесничество Советскай Союз Геройа, буойун-лесник Николай Саввич Степанов искибиэригэр долохоно, акация, черемуха, яблоня үнүгэстэрин олортулар. Тэрээһин Аҕа дойду Улуу сэриитигэр охтубуттар кэриэстэригэр ыытыллар Бүтүн Арассыыйатааҕы экологическай-патриотическай ааксыйа чэрчитинэн ыытылынна.
Пуонда кыттыылаахтара бүгүн Тулалыыр эйгэни харыстааһын күнүгэр Дендропарканы ыраастаатылар, үс массыына бөх-сыыс тиэйдилэр, мастар үнүгэстэрин олортулар.
«Олох суола».