Ааспыт өрөбүллэргэ Тыымпыга сылын аайы ыытыллар биллиилээх тустуук, спорт маастара, Үөһээ Бүлүү улууһун бочуоттаах олохтооҕо Выбор Быкалыров аатынан хапсаҕайга «А» категориялаах өрөспүүбүлүкэтээҕи турнир тэрилиннэ.
Икки күннээх сытыы хапсыһыылар түмүктэринэн таһымнаах турнирга бастыҥтан бастыҥнар ааттаннылар, бириистэринэн наҕараадаланнылар.
57 кг Тааһаҕартан биллиилээх маастар Федор Харлампьев чемпион үрдүк аатын ылыан ылла. Иккис миэстэни Үөһээ Бүлүүттэн Александр Егоров, үсүһү – Ньурбаттан Валерий Антонов ыллылар.
65 кг Бүлүүттэн биллэр маастар Дмитрий Винокуров бастаата. Иккискэ — Хаҕынтан Петр Алексеев, үһүскэ — Балаҕаччыттан Сергей Александров таҕыстылар.
75 кг Үөһээ Бүлүүттэн Семен Тимофеев бастаата, Мукучуттан Владислав уонна Константин Левчиковтар иккис-үһүс миэстэлэри үллэһиннилэр.
85 кг Тыымпы бөҕөһө Юрий Сергин чемпион буолан биир дойдулаахтарын үөртэ, иккис миэстэни Кэбээйи Мастааҕыттан Алексей Уваровскай, үсүһү – Сунтаартан Евгений Николаев ыллылар.
95 кг Үөһээ Бүлүүттэн биллиилээх маастар Платон Саввинов бастаата, иккис – Мукучуттан Павел Николаев, үһүс – Намтан Ариан Гоголев буоллулар.
95 кг үөһэ биллиилээх маастар Николай Николаев чемпион үрдүк аатын сүктэ, иккис-үһүс үктэллэргэ Ньурбаттан Степан Тобонов уонна Дмитрий Нехоруков таҕыстылар.
Выбор Быкалыров турнирын муҥутуур кыайыылааҕынан «Дыгын оонньууларын» урукку чемпиона Алексей Уваровскай таҕыста.
«Олох суола».
Афанасий Тимофеев фотолара, видеота.