Бүлүү ааптардара өрөспүүбүлүкэ билиниитин ыллылар

Ахсынньы 17 күнүгэр өрөспүүбүлүкэ национальнай библиотекатын историческай саалатыгар Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларыгар ананан ытыллыбыт «Дьиэ кэргэн бастыҥ кинигэтэ» күрэх  түмүктэннэ. Күрэххэ уопсайа  араас улуустартан 36 үлэ киирэн улахан көрүүнү, сыанабылы ааспыт. 

Дьүүллүүр сүбэҕэ Саха сирин норуодунай суруйааччыта Сэмэн Попов-Тумат, Арассыыйа суруйааччыларын сойууһун чилиэнэ Евдокия Иринцеева-Огдо, бэйиэт, прозаик, Афанасий Гуринов-Арчылан, СӨ Национальнай библиотекатыттан  Кыраайы үөрэтэр национальнай кинигэ салаатын сэбиэдиссэйэ Лариса Кычкина уонна кинигэ кыһатын салайааччыта Наталья Игнатьева үлэлээн кыайыылаахтары быһаардылар.

Сүбэ быһаарыытынан  I үрдэлгэ   Федот Семенович Тумусов «Балбаара, Сэмэн Тумууһаптар. Ыал. Удьуор утума. ХХI үйэ кинигэҕэ», II үрдэлгэ Любовь Михайловна Григорьева, Татьяна Игнатьевна Андросова «Мөккүөрдээх кэм туоһулара», III үрдэлгэ Прокопий Иванович Антипин  «Оонньообут тиэргэммит ахтылҕана» кинигэлэрэ тахсан Добун суруктарынан бэлиэтэннилэр.  Маны таһынан, биирдиилээн үлэлэр саха суруйааччыларын биһирэбиллэрин  туттулар.

Бүлүүбүт улууһуттан кыттыбыт Н.И.Протопопова аатынан «Кэскил» оҕо интеллектуальнай  сайдыытын киинин «Репортер» медиацентр салайааччыта Кыдана Дорофеева «Оҕо саас ахтылҕана» кинигэтинэн Саха сирин норуодунай суруйааччыта Сэмэн Попов – Тумат биһирэбил суругунан бэлиэтэннэ.

Кыдана Владимировна оҕо сааһын умнуллубат дьоллоох кэмнэрин, көрдөөх-көрүдьүөс  түгэннэрин суруйбут кинигэтэ  2020 сыллаахха  Бүлүү куоратыгар «Спектр» полиграфия киинигэр бэчээттэммит.

Онтон, биир дойдулаахпыт, элбэх кинигэни бэчээккэ бэлэмнээн таһаарбыт муниципальнай сулууспа туйгуна, Өрөспүүбүлүкэ архыыбын тутаах отделын салайааччыта Венера Федоровна Тихонова хомуйан быйыл таһаартарбыт «Дети С.М.Аржакова. Достойной дорогой отца» кинигэтэ  Өрөспүүбүлүкэ национальнай библиотекатын үрдүк биһирэбилин ылан анал наҕарааданы тутта.

Кинигэҕэ  Степан Аржаков дьиэ кэргэнин, оҕолорун туһунан урукку сылларга ханна да бэчээттэмэтэх архыып дөкүмүөннэрэ,  дьиэ кэргэн илдьэ сылдьыбыт тус матырыйааллара туһаныллыбыт.   Эрдэтээҥҥи «Степан Максимович Аржаков» (2009г.) уонна  «Варвара Ивановна Аржакова» (2014г.).  диэн кинигэлэри салгыы ситэрэн биэрэр ис хоһоонноох.  Бүлүүгэ  балаҕан ыйыгар, куорат 390 сылын туолар үбүлүөйдээх күннэригэр,  киэҥ араҥаҕа сүрэхтэммитэ.

Ити курдук, түмүктэнэн эрэр Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларыгар, Бүлүү улууһугар  биллиилээх судаарыстыбаннай диэйэтэл Степан Аржаков 125 үбүлүөйдээх сылларын түмүктүү өссө саҥа ситиһиилэри аҕалбыттарынан Венера Федоровнаҕа уонна Кыдана Владимировнаҕа истиҥ эҕэрдэбитин тиэрдэбит. Кэлэр сыл өссө ситиһиилээх буоллун диэн алгыыбыт.

Онтон ааҕааччыларбытын  өрөспүүбүлүкэҕэ биһирэммит кинигэлэри кэлэн көрөргүтүгэр, тутан олорон сиһилии билсэргитигэр ыҥырабыт.

 Луиза Кононова, киин библиотека кыраайы үөрэтиигэ салаатын кылаабынай библиотекара.