Бэс ыйын 14-15 күннэригэр үбүлүөйдээх «Ытык Бүлүү алгыстаах ыһыаҕар» тэриллэр «Бүлүү Боотур» спорт национальнай көрүҥнэрин аһаҕас күөн-күрэҕэр Саха сирин, Бүлүү улууһун күүстээх-уохтаах, сымса-быһый эр бэртэрэ кыттыыны ылыахтара. Урут улуус таһымнаах күрэхтэһии буоллаҕына, быйыл «Бүлүү Боотур» өрөспүүбүлүкэтээҕи таһымнаах буолла. Уопсайа 1,2 мөл солк. бириис пуондалаах быйылгы «Бүлүү Боотур» күрэхтэһиигэ кимнээх кытталларый?
Улуустааҕы спорт кэмитиэтин бэрэссэдээтэлэ Ольга Калачиков билиһиннэрбитинэн, бэс ыйын 13 күнүгэр күрэхтэһиигэ кыттарга спортсменнартан сайаапкалары хомуйуу түмүктэммит.
— Бэс ыйын 14 күнүн туругунан өрөспүүбүлүкэтээҕи «Бүлүү Боотур» спорт национальнай көрүҥнэрин аһаҕас күөн-күрэҕэр 16 чулуу эр бэртэрэ кытталлара чуолкайданна. Кинилэр кимнээхтэрий?
Хотугу многоборьеҕа спорт маастара, өрөспүүбүлүкэ күрэхтэһиилэрин чемпиона, призера, «Бүлүү Боотур — 2022», «Бүлүү Боотур — 2023» 400 м сүүрүүгэ үрүҥ көмүс призера Айаал Никифоров (Бүлүү), Альберт Нифонов (Бүлүү).Атах оонньуутугар спорт маастара, элбэх күрэхтэһиилэр чемпионнара, призердара, «Бүлүү Боотур — 2022» үрүҥ көмүс призера Күндүл Карбаканов (Бүлүү).
Биатлоҥҥа Бүтүн Арассыйатааҕы, Саха сиринээҕи күрэхтэһиилэр призердара Антон Уваров (Бүлүү), Конон Спиридонов (Бүлүү). «Бүлүү Боотур — 2022»многоборьеҕа спорт маастара, өрөспүүбүлүкэ күрэхтэһиилэрин призера Эдуард Атаманов (Бүлүү),
Пауэрлифтиҥҥэ өрөспүүбүлүкэ чемпионатын үрүҥ көмүс призера, РФ спордун маастара Сергей Протопопов (Бүлүү).
Атах оонньуутугар спорт маастара, хапсаҕайга өрөспүүбүлүкэ күрэхтэһиилэрин чемпиона, призера Александр Алексеев (Бүлүү), 2017 сыллааҕы «Олоҥхо ыһыаҕын» үөрэнээччилэргэ саха многоборьетыгар чемпиона Анастас Яковлев (Бүлүү).
Атах оонньуутугар уонна саха многоборьетыгар спорт маастара, «Дыгын оонньууларын» кыттыылааҕа, многоборьеҕа «Эрилик оонньууларын» кыайыылааҕа Айсен Ботуев (Үөһээ Бүлүү).
Хотугу уонна национальнай многоборьеҕа спорт маастара, өрөспүүбүлүкэ чемпиона Петр Прудецкай (Үөһээ Дьааҥы).
Атах оонньуутугар уонна национальнай многоборьеҕа спорт маастара, «Дыгын оонньууларын — 2020» кыайыылааҕа Леонид Филиппов, (Амма).
Мас-рестлиҥҥэ, многоборьеҕа спорт маастара, национальнай многоборьеҕа өрөспүүбүлүкэ чемпиона Тимофей Большаков (Сунтаар).
Мас-рестлиҥҥа спорт маастара Айсен Семенов (Өлөөн).
Мас-рестлиҥҥа спорт маастара, элбэх күрэхтэһии кыайыылааҕа, Арассыыйа чемпионаттарын призера Александр Пшенников (Дьокуускай).
Мас-рестлиҥҥэ спорт маастарыгар хандьытаат, Арассыыйа призера, өрөспүүбүүкэ многоборьеҕа чемпионаИван Степанов (Дьокуускай).
«Бүлүү Боотур» сүрүн бирииһин — 500 тыһ. солк. иһин көрөөччүлэри сытыы киирсиилэр күүтэллэр.
Николай Куприянов.