1993 с. Саха Өрөспүүбүлүкэтигэр бастакы Президеммит Михаил Ефимович Николаев Ыйааҕынан алтынньы 15 күнүгэр Ийэ күнэ олохтоммута уонна аан бастаан өрөспүүбүлүкэҕэ, улууска өрө көтөҕүллүүлээхтик бэлиэтэммитэ.
Бүлүү улууһугар Дьиэ кэргэн, дьахталлар уонна оҕолор отделларыгар сэбиэдиссэйинэн Клара Егоровна Саввинова, исписэлииһинэн Евдокия Серафимовна Кирикова 14 сыл устата үлэлээбиппит, улууска бастакы Ийэ күннэрин биһиги тэрийэн ыыппыппыт.
Бүлүү улууһа өрөспүүбүлүкэҕэ саамай элбэх Герой ийэлээх улууһунан биллэр. Биһиги улууспутугар барыта 105 Герой ийэлээхпит. Кинилэртэн саамай эдэрдэрэ, 2020 с. Герой аатын сүкпүт эдэркээн ийэ – Андреева Сардаана Спиридоновна Сосновкаҕа олорор. Күн бүгүн улууска 18 Герой ийэ баар. Кинилэр биһиги киэн туттуубут, инники күөҥҥэ тутар үтүөкэннээх кэрэ дьоммут буолаллар.
Клара Саввинова, Албан аат музейын сэбиэдиссэйэ.