Аммаҕа от ыйын 12-16 күннэригэр ыытыллар доруобуйаларынан хааччахтаах спортсменнарга сөп түбэһэр спорт параолимпийскай көрүҥнэригэр Саха Өрөспүүбүлүкэтин XIVспартакиадатын үһүс күнүн түмүгүнэн Бүлүү улууһун хамаандатын спортсменнара 6 үрүҥ көмүс, 2 боруонса мэтээллэри ылары ситистилэр.
Аммаҕа ыытыллар доруобуйаларынан хааччахтаах спортсменнар бастакы спартакиадалара спорт параолимпийскай көрүҥнэринэн тэриллэр. Саха сиригэр ыытыллар спартакиада Арассыыйаҕа бастакынан тэриллибитин үөрүүлээх арыйыыга этиллибитэ.
Спартакиаданы үөрүүлээх арыллыытыгар Арассыыйа параолимпийскай кэмитиэтин вице-президенэ, параолимпийскай оонньуулар чемпионнара Иван Потехин кыттыыны ылбыта элбэҕи этэр. Параолимпийскай спорт көрүҥнэригэр Саха сириттэн биллэр спортсменнар Анастасия Диодорова, Степанида Артахинова, Владимир Балынец уо.д.а. ситиһиилээхтик кытталлар, атыттарга спорт чыпчаалларын дабайарга үтүө холобур буолаллар.
Улуус спорка кэмитиэтин бэрэссэдээтэлэ Гаврил Евсеев спартакиада иннигэр пневматика бэстилиэтинэн ытыы, чэпчэки атлетика, остуол тенниһэ көрүҥнэригэр эрэнэллэрин, Саха сиригэр биллэр спортсменнарбыт ситиһиилээхтик кыттарга эрдэттэн бэлэмнэммиттэрин билиһиннэрбитэ.
Ол да курдук буолла. Спартакиадаҕа киллэриллибит голболга, олорон эрэ волейболга Бүлүү спортсменнарын хамаандаларын түмүктэрэ сэмэй соҕустар. Билиҥҥитэ бүлүүлэр спартакиада мэтээллэрин чэпчэки атлетикаҕа, ытыыга ыллылар.
От ыйын 13 күнүгэр 100 м кэлээскэнэн сүүрүүгэ Алла Николаева бүлүүлэртэн бастакы мэтээли ылары ситиһэн, хамаандаҕа улахан үөрүүнү аҕалбыта. Иккис мэтээли эмиэ 100 м кэлээскэнэн сүүрүү атын категориятыгар Русанда Матвеева ылбыта.Элбэх күрэхтэһии кыайыылааҕа Антон Попов 100 м сүүрүүгэ, лидер-спортсменнаах эмиэ 100 м сүүрүүгэ Дмитрий Чабыев уонна Василий Каратаев биэтэккэ иккиһинэн кэлэннэр үрүҥ көмүс мэтээллэри ылбыттара. Сүүрүүгэ биһиги хамаандабыт тумус туттар уонна эрэнэр спортсменнара кыайыылаахтартан бэрт кыранан хаалбыттарын бэлиэтиэххэ сөп.
Эмиэ ити күн спорт маастарыгар хандьытаат, өрөспүүбүлүкэ биир күүстээх ытааччыта Надежда Алексеева пневматика бэстилиэтинэн ытыыга боруонса мэтээли ылбыта.
От ыйын 14 күнүгэр 400 м сүүрүүгэ Арассыыйа, өрөспүүбүлүкэ таһымнаах күрэхтэһиилэргэ кыттарИлья Павловардах ортотунан эрчимнээхтик сүүрэн боруонса мэтээли ылан хамаанданы улаханнык үөртэ.Куруук үөрэ-күлэ сылдьар Илья Павлов доруобуйаларынан хааччахтаах спортсменнар чэпчэки атлетикаҕа улуустааҕы хамаандаларын тириэньэрэ буолар.
Чапчылҕаҥҥа тэриллибит пневматика бэстилиэтинэн ытыы күрэхтэһиитигэр бастакы разрядтаах Василий Прокопьев үрүҥ көмүс мэтээл хаһаайынынан буолан үөрүүнү үксэттэ.
Икки күн түмүгүнэн ытыыга Надежда Алексеева уонна Василий Прокопьев ылбыт очуокуоларын холбоон, бүлүүлэр хамаанданан бастаан, спартакиада бастакы Кубогын ылары ситистилэр!
Бүгүн, от ыйын 15 күнүгэр Бүлүү спортсменнарын дуобакка, чэпчэки атлетикаҕа, остуол тенниһигэр быһаарыылаах оонньуулар күүтэллэр.
Николай Куприянов.