Намҥа ахсынньы 16-17 күннэригэр 26 төгүлүн ыытыллыбыт хапсаҕай тустуутун федерациятын Кубогар Бүлүү улууһун хамаандата өр сыл буолан баран үһүс миэстэни ылары ситистэ.
Федерация Кубога тэриллибит үйэ чиэппэрин — 25 сылын тухары Бүлүү хапсаҕайдьыттара түөрт төгүл миэстэлэспиттэрэ. Ол курдук, 1998, 1999 сыллардаахха үрүҥ көмүс, 2005, 2007 сыллардаахха боруонса мэтээллэри ылары ситиспиттэрэ.
Быйыл өрөспүүбүлүкэҕэ 4 миэстэлээх, күүстээх састааптаах Бүлүү хамаандата Федерация Кубогар «тыас таһаарыа» диэн Бүлүү тустууну таптааччылара кэтэспиттэрэ. Ол курдук, хамаанда састаабыгар киирэр эдэр тустууктарбыт быйылгы өрөспүүбүлүкэтээҕи күрэхтэһиилэргэ бэркэ тустубуттара. Комментатордар Миша Семеновы, Дима Винокуровы, Василий Григорьевы бэлиэтээбиттэрэ. Федерация Кубогын иннинэ эр дьоннор, бэтэрээннэр Бүлүү куоратыгар ыытыллыбыт Василий Румянцев, Үөһээ Бүлүү Кырыкыйыгар тэриллибит турнирдарга ситиһиилээхтик тустубуттара. Аатырбыт хапсаҕайдьыппыт Николай Николаев кыһын тэриллибит өрөспүүбүлүкэтээҕи турнирдарга кыайталаабыта уонна 2023 сылга Саха сирин бастыҥ хапсаҕайдьыта буолбута. Кини «Сахаада-спорт» ассоциация хапсаҕайга 2023 сыллааҕы спортивнай лауреатынан ааттаммыта.
Бүлүү тустууну таптааччылара «Саха» көрдөрөр-иһитиннэрэр хампаанньа Федерация Кубогын быһа биэриитин икки күнү быһа астына-дуоһуйа көрдүлэр, хапсаҕайдьыттарбыт тустууларын сэргээтилэр, «тэҥҥэ туһуннулар».
Хапсаҕай сылы түмүктүүр улахан күрэхтэһиитигэр Бүлүү улууһун чиэһин уолаттарга Миша Сергеев, Сандал Прокопьев, Миша Семенов, Дима Винокуров, Витя Чирков, Илья Семенов, бэтэрээннэргэ Анатолий Сергеев, Николай Николаев, Дмитрий Иванов, Клим Иванов, Константин Мандаров, эр дьоннорго Федор Харлампьев, Василий Григорьев, Дмитрий Ушницкай, Роман Николаев, Николай Николаев, Иван Алексеев көмүскээтилэр, бэртээхэй тустууну көрдөрдүлэр.
Саха сирин хапсаҕайга 10 бастыҥ хамаандалара икки бөлөххө араарыллыбыттара, биһиги хамаандабыт намнары кытта күүстээх бөлөххө түбэспитэ.
Бастакы эргииргэ бүлүүлэр күрэхтэһии хаһаайыннарыгар – намнарга 7:10 ахсаанынан хотторбуттара, онтон былырыыҥҥы Кубок кыайыылаахтарын мэҥэ-хаҥаластары 10:7, уус алданнары 13:4, күүстээх Сунтаар хамаандатын 11:6 ахсаанынан кыайбыттара. Уолаттар арыый итийэн-кутуйан баран намнарга тахсыбыттара буоллар түмүк хайдах буолуо этэй? Мэҥэлэр намнарга 8:9 кыайтарбыттара.
Намнар бастакы күн көбүөргэ үстэ тахсыбыттара. Кинилэр иккис күнүнээҕи тустууларыттан биһиги ханнык мэтээл туһугар киирсэрбит тутулуктаммыта эрээри, күрэхтэһиигэ кыайан хоннохторо арыллыбатах уус алданнары тулуппатахтара. Түмүгэр финалга намнар уонна үөһээ бүлүүлэр тахсыбыттара. Сытыы киирсиигэ үөһээ бүлүүлэр өрөгөйдөрө тахсыбыта.
Биһиги хапсаҕайдьыттарбыт үһүс миэстэни былдьаһыыга күүстээх Хаҥалас хамаандатын 11:6 ахсаанынан кыайдылар. Хапсаҕайдьыттарбыт бары бэркэ туһуннулар, Дмитрий Ушницкай кылбар быраҕыытын кэннэ бүлүүлэр үһүс миэстэни ылбыппыт чуолкайдаммыта.
Сунтаардар, мэҥэлэр очукуоларынан 5-6 миэстэлэри ылбыттарын бэлиэтиэххэ сөп.
Кубок кыайыылаахтарын наҕараадалааһын кэмигэр 2023 сыл түмүгүнэн Саха сирин бастыҥ хапсаҕайдьыттарыгар: эр дьоннорго Николай Николаевка, уолаттарга Дмитрий Винокуровка харчынан бириэмийэ, кубоктар туттарылыннылар.
Хамаанда кылаабынай тириэньэрэ Дмитрий Акимов, тириэньэрдэр Василий Иннокентьев, Афанасий Матвеев таһаарыылаах, түмсүүлээх үлэлэрин бэлиэтиэххэ сөп.
Күрэхтэһиигэ улуус баһылыгын бастакы солбуйааччы Иван Евсеев, улуус баһылыгын социальнай эйгэҕэ солбуйааччы Александр Прокопьев, Арыылаах нэһилиэгин баһылыга Афанасий Тимофеев, улууска спорт салайааччылара Гаврил Евсеев, Степан Федоров уо.д.а. биир дойдулаахтарын өйөөтүлэр, күүс-көмө буоллулар.
Эдэр хапсаҕайдаһар уолаттарбыт күүскэ тахсан иһэллэрин, эдэр тириэньэрдэр түмүктээх үлэлэрин бэлиэтиир тоҕоостоох.
Кубок күрэхтэһиитин ыыппыт комментатордар Бүлүү хамаандата өр сыл буолан баран бириистээх миэстэҕэ киирсибитин, күүстээҕин, тэҥ састааптааҕын, инникилээҕин чорботон бэлиэтээтилэр, эһиилги Федерация Кубогар бүлүүлэр тустууларыттан элбэҕи кэтэһэллэрин эттилэр.
Бүлүү хапсаҕайдьыттарын, тириэньэрдэри сыл тутаах турнирыгар дьоһуннаах ситиһиилэринэн эҕэрдэлиэххэ!
Николай Куприянов.