Атырдьах ыйын 13 күнүгэр Бүлүү куоратын «Эрчим» спорт комплексын иннинээҕи былаһааккаҕа тэриллиилээх хаһаайыстыбалар салайааччыларыгар аныгы валочнай типтээх МТЗ-82.2 тыраахтардар күлүүстэрин үөрүүлээх быһыыга-майгыга туттардылар.
Саҥа, аныгы оҥоһуулаах уонна кыамталаах тыраахтардар күлүүстэрин туттарыы Бүлүү улууһугар «Сүөһү аһылыгын оҥорууну дэлэтии» өрөспүүбүлүкэтээҕи бырагырааманы сииһиилээхтик үлэлэтии түмүгэ буолар. Бүлүү улууһа уонна тыа хаһаайыстыбатын министиэристибэтэ бырагырааманы бииргэ хаһыс да сылларын таһаарыылаахтык үлэлэтэллэрин бэлиэтиэххэ сөп. Кыттыгас өрүттэр үбүлээһиннэринэн үлэлиир бырагыраама көмөтүнэн улуус бөдөҥ кэпэрэтииптэрэ, бааһынай хаһаайыстыбалара тиэхиньикэнэн балай да хааччылыннылар, араас кэриҥнээх тутууну ыыттылар.
Бырагыраама быйылгы хайысхатынан тыа хаһаайыстыбатын салаатын тэрилтэлэрэ саҥа валочнай типтээх «Беларусь» тыраахтардарынан, оту-маһы, талаҕы төрдүттэн илдьиритэр мульчердарынан хааччылыннылар. Сотору кэминэн хаһаайыстыбаларга атын да тиэхиньикэ: пресс-подборщиктар, роторнай от охсордор аҕалыллыахтара. Бырагыраама көмөтүнэн хаһаайыстыбаларга от, үүнээйи сиэмэтэ атыылаһыллыбыта, Лөкөчөөҥҥө 300 т оту харайар тутуу оҥоһуллуохтаах.
Үөрүүлээх тэрээһиҥҥэ этиллибитинэн, Бүлүү улууһа Саха сиригэр саҥа валочнай типтээх тыраахтардары саамай чэпчэки сыанаҕа – 2,6 мөл. солк. атыыласпыт. Ити сууматтан кэпэрэтииптэр 30 % эрэ уйуналлар, 70 % улуус уонна министиэристибэ үбүлүүллэр.
Саҥа МТЗ-82.2 тыраахтардар күлүүстэрин улуус баһылыгын бастакы солбуйааччы Иван Евсеев «Ампаардаах» ХЭУо бэрэстэбиитэлигэр, Чинэкэ урбаанньыта Семен Николаевка, «Бөтүҥ» кэпэрэтиип салайааччытыгар Олег Федоровка, «Хаҕын» кэпэрэтиип салайааччытыгар Алексей Афанасьевка, «Тыымпы» кэпэрэтиип салайааччытыгар Виктория Сыромятниковаҕа туттарда.
Улуус тыа хаһаайыстыбатын сайыннарыыга муниципальнай бырагырааматын үбүнэн ылыллыбыт саҥа тыраахтар күлүүстэрэ «Чинэкэ-Агро» кэпэрэтиип салайааччытыгар Семен Семеновка ытыс тыаһын ортотугар туттарылынна. Итини тэҥэ, үөрүүлээх тэрээһиҥҥэ «Кыргыдай» кэпэрэтиип эрдэ ылбыт тыраахтарын сыаната толуйуллубута бэлиэтэннэ.
Тыа хаһаайыстыбатын департаменын салайааччы Павел Иннокентьев бэлиэтээбитинэн, Анастасия Кырбасова салайааччылаах «Илин» хаһаайыстыбаҕа сири таҥастыыр мульчер бэриллибит. Итиник мульчеры атыыласпыт урбаанньыт Андрей Арбыкиҥҥа тэрил сыаната кэлин эмиэ толуйуллуохтаах.
Саҥа кэлбит тиэхиньикэ сири оҥорууга, ходуһалары тупсарыыга, бааһына таһаарыыга туттуллуохтаах. Министиэристибэ, улуустааҕы департамент тыа хаһаайыстыбатын сайыннарыыга саҥа, кэскиллээх былааннарынан.
Николай Куприянов.
Николай Куприянов уонна Дмитрий Алексеев фотолара.