Бүлүү куоратын дьаһалтата куорат иһинээҕи суол тутуутун, бырайыактааһынын боломуочуйатын бу сайын оройуон Сэбиэтин депутатттарынан бигэргэтэн улуус дьаһалтатыгар биэрбитэ. Куорат уонна улуус дьаһалталара бииргэ үлэлэһэр буолбут түмүктэригэр мөлтөх суоллаах-иистээх куоракка элбэҕи эрэннэрэр хамсааһын саҕаланан эрэр. Ол туһунан биһиэхэ Бүлүү куоратын дьаһалтатын баһылыга Ян Попов кэпсээтэ.
— Биһиги улуус дьаһалтатын, чуолаан, бырамыысылыннас, тутуу уонна ОДьКХ управлениетын кытта куорат суолларын көрөн-истэн, үөрэтэн, аспаал бастакы уочарат өссө ханна ууруохха сөбүн кэпсэттибит. Чапаев уулуссата аспаалламмытын кэннэ Бүлүүгэ хайаан да эргиир аспаллаах суол наада диэн көрөбүт. Чапаеваттан Иона Попова, Интернациональная онтон Аммосова уулуссанан федеральнай суолга тахсар суол наада эбит диэн быһаардыбыт. Оччоҕуна биһиги куораппытыгар ити аспааллаах уулуссаларынан айаннаан киһи наадатын барытын ситиһэр буолар. Ол кэнниттэн иһинээҕи суоллары — Ярославскай, Орджоникидзе, Марк Жирков, уо.д.а. уулуссалары аспааллаан биэриэхтээхпит. Бу улахан “Вилюйская кольцевая автодорога” диэн ааттаах үлэ бырайыактааһына саҕаланан эрэр. Былаан быһыытынан — бырайыак оҥороммут Минтранска сайаапка түһэрэбит, суол пуондатыттан харчы тыырсабыт. Быйыл харчы түстэҕинэ куораппыт уулуссалара инникитин аспаалынан бүрүллүө этилэр. Ол туһугар күүстээх үлэ бара турар. Бүлүү 390 сыллаах үбүлүөйүгэр эргиир суол тутуута куорат олохтоохторугар дьоһун бэлэх буолуо этэ. Ыытар үлэбит түмүктээх буолуо диэн эрэнэбит.
Изольда Загитова.