Ааспыт сыл ахсынньытыгар ыытыллыбыт Саха сиринээҕи мас-рестлинг (мас тардыһыы) федерациятын президиумун кэллиэгийэтигэр Гаврил Евсеев Бүлүү куорат 390 сыллаах үбүлүөйүгэр аналлаах куорат күнүгэр дьон болҕомтотун тардар Арассыыйа күүстээх-кыахтаах спортсменнара кыттыылаах спорт силовой көрүҥнэригэр куоталаһыыны ыытарга этии киллэрбитэ.
Саха сирин мас тардыһыытын федерациятын президенэ, Саха сирин, Арассыыйа, Европа уонна аан дойду чемпиона Анатолий Баишев кыттыылаах кэллиэгийэ бүлүүлэр этиилэрин кытта сөбүлэспитэ. Бүлүү улууһун баһылыга Сергей Винокуров уонна Бүлүү куорат баһылыга Ян Попов күүстээхтэр күрэхтэһиилэрин тэрийэри сөбүлэспиттэрэ, күрэхтэһиини ыытары өйөөбүттэрэ, үбүлүөй тэрээһинин былааныгар киллэрбиттэрэ.
2009 сыллаахха Бүлүүгэ ыытыллыбыт күүстээхтэр мас тардыһыыларыгар Анатолий Баишев уонна Михаил Кокляев былчыҥ быһыта барыылаах сытыы киирсиилэрин дьон олус сэргээн көрбүтэ. Ол кэмтэн ыла Анатолий Баишев Михаил Кокляевы кытта билсэр, ыкса сибээһи тутуһар. Анатолий Баишев ыҥырыытынан Бүлүү куорат үбүлүөйүгэр Арассыыйа бухатыырдара кэлиэхтээхтэр. Билигин Белоруссия, Казахстан, уонна бырааттыы Монголия кыахтаахтарын кытта кэпсэтии бара турар. Оччоҕуна Бүлүүгэ ыытыллар күрэхтэһии норуттар икки ардыларынааҕы таһымнаах буола түһэр.
Саха Өрөспүүбүлүкэтин күнүгэр улуус баһылыгын бастакы солбуйааччы Иван Евсеев, улуус баһылыгын социальнай эйгэҕэ солбуйааччы Анатолий Прокопьев, куорат баһылыга Ян Попов, үп-казначейскай управление салайааччыта Анисим Алексеев, спорт салаатын үлэһиттэрэ Анатолий Баишевы кытта көрүстүлэр. Мунньах кыттыылаахтара күрэхтэһии хайдах кэриҥнээхтик барыахтааҕын, ханнык көрүҥнэр киирэллэрин чопчулаатылар, күрэхтэһиини ыытарга илии тутустулар, күнүн-дьылын болдьостулар, бэс ыйын 1 күнүгэр диэри турар боппуруостары барытын быһаарарга сөбүлэстилэр.
Күрэхтэһии үбүнэн бириистэрин, ороскуотун бырайыага оҥоһулунна диэххэ сөп.
Арассыыйаттан 12 күүстээх стронгменнар, Саха сириттэн 5-6 бухатыыр 6 көрүҥҥэ: мас тардыһыытыгар, хапсаҕайга, ыарахан көлүөһэни төкүнүтүүгэ, Бүлүү тааһын ыраахха илдьиигэ, автобуһу соһууга, тааһы көтөҕүүгэ күөн көрсүөхтэрэ. 7-ис көрүҥү тэрийэччилэр өссө быһаарса сылдьаллар.
Силовой экстрим куоталаһыытын үөрүүлээхтик түмүктүүр муҥутуур күрэхтэһиитинэн мас тардыһыытыгар саха бухатыыра Анатолий Баишев уонна нуучча бухатыыра Михаил Кокляев киирсиилэрэ буолуон сөп.
Түгэнинэн туһанан биллиилээх мадьыны, саха бухатыыра Анатолий Баишев бүлүүлэри Саха Өрөспүүбүлүкэтин күнүнэн истиҥник эҕэрдэлээтэ, бары үчүгэйи баҕарда, «Манчаары оонньууларын» кэмигэр күүстээхтэр мас тардыһыылара бэркэ тэриллибитин бэлиэтээтэ, кэлэр күрэхтэһии эмиэ таһымнаахтык тэриллиэ диэн эрэлин биллэрдэ.
Куорат 390 сыллаах, Степан Аржаков төрөөбүтэ 125 сылыгар аналлаах муҥутуур күүстээхтэр күрэхтэһиилэрэ билиҥҥитэ балаҕан ыйын бастакы өрөбүлүгэр – Бүлүү куорат күнүгэр тэриллэрэ былааҥҥа сылдьар.
Николай Куприянов.