Ахсынньы 7 күнүгэр Бүлүү куоратын М.Н.Жирков аатынан култуура Дыбарыаһын иннигэр сарсыарда 10 чаастан Саха сирин биир саамай кырдьаҕас нэһилиэгэ — төрүттэммитэ 390 сылын бэлиэтээбит Үгүлээт быйаҥнаах дьаарбаҥкатын тэрийдэ. Кырдьаҕас Бүлүү куоратын олохтоохторо дьаарбаҥкаҕа сылдьан Түҥ өрүс балыгын арааһыттан, Амыһаах күөллэрин бөдөҥ соботуттан, саха ынаҕын этиттэн, буотараҕыттан саҥа дьыллааҕы сандалыларын киэргэтэргэ атыылаһан бардылар. Сорсуннаах булчуттар, балыксыттар тоҥон-хатан үлэлээн ылбыт бултара атыыга барбытыттан үөрүүлэрэ үгүс.
Дыбарыас киирии саалатыгар норуот талааннаахтарын быыстапката арылынна. Миирнэй куораттан сылдьар биһиги биир дойдулаахпыт Саха Өрөспүүбүлүкэтин норуотун маастара, СӨ уран оҥоһук маастара Вера Семеновна Атасыкова сарыыттан, кыбытык тигииттэн, оҕуоруонан оһуордаммыт сонноро, оһуор-дьарҕаа киэргэллэрэ киһини сөхтөрөр. Быыстапкаҕа Үгүлээт нэһилиэгин уран тарбахтаахтарын, оҕуруо анньааччыларын, уруһуйдьуттарын оҥоһуктарын туруордулар. Кэлбит дьон-сөҕөн махтайан бардылар.
Маны сэргэ Үгүлээт оскуолатын оҕолоро нэһилиэкпит 5 саарынын кэлбит дьоҥҥо билиһиннэрдилэр, хас биирдии киһи интэриэһиргиир боппуруостарыгар лоп — бааччы эппиэттээннэр оҕолору сэргээтилэр, оҕолорго махтаннылар. Саарыннары билиһиннэрдилэр : 11 кылаас үөрэнээччитэ Света Алесеева уонна 10 кылаас үөрэнээччитэ Каролина Харлампьева.
Ол бириэмэҕэ оскуолабыт бизнес инкубаторын оҕолоро быыстапка — ярмарка оҥордулар. Атыыны тэрийэн, иилээн — саҕалаан ыыттылар- 10 кылаас үөрэнээччилэрэ Прокопьев Иван уонна Долгунов Валерий. Атыылара хамаҕатык баран , баар дьон сэҥээриитин, махталын ылан, хайҕанан, үөрүүлэрэ- көтүүлэрэ сүрдээх.
» Оһуохайдаан ойуохха, эһиэхэйдээн тэйиэххэ» диэн оһуокай түһүлгэтин Каролина Петровна Харлампьева, Федора Егоровна Донская — Саха Өрөспүүбүлүкэтин Дархан этээччилэрэ, Үгүлээт нэһилиэгин бочуоттаах олохтоохторо саҕалаатылар. Матрена Лукинична Мунхасытова — удьуор утумун салҕааччы, Алан Мунхасытов — эдэр этээччи, Үгүлээт нэһилиэгин кэскилэ оһуокай түһүлгэтин киэргэттилэр.
Киэһэ биэс чаастан «Үүнэ, сайда тур, Үгүлээт» эҕэрдэ кэнсиэр саҕаламмыта. Дыбарыас иһэ тобус толору киһинэн туолбут, миэстэ тиийбэт буолан эбии олоппостору киллэрэн көрдүлэр.
Ити курдук тэрээһиннээхтик, үрдүк таһымнаахтык Үгүлээт күннэрэ Бүлүү куоратыгар ыытылыннылар.
Лена Мандарова, Үгүлээт.
Мантан салгыы бар дьоммут санааларын тиһэммит ыытабыт:
— Ытыктабыллаах Октябрь Иванович, Үгүлээт нэһилиэгин олохтоохторо!
Күндү биир дойдулаахтарым!
Төппүрүүн кинээс сыдьааннарын уонна тус бэйэм ааппыттан Үгүлээт нэһилиэгэ төрүттэммитэ 390 сыллаах өрөгөйдөөх үбүлүөйүнэн итиитик-истиҥник эҕэрдэлиибин!
Үгүлээт нэһилиэгэр эйэҕэс-сайаҕас, идэлэригэр бэриниилээх үлэһит бэрдэ дьон үлэлиир-хамсыыр, оҕо уһуйааныгар уонна оскуолаҕа кэрэчээн оҕолор – нэһилиэкпит инники кэскиллэрэ – иитиллэллэр, үөрэнэллэр.
Нэһилиэк үүнэригэр-сайдарыгар биллэр-көстөр, дьоһун кылааттарын киллэрбит бэтэрээннэрбитигэр, бастыҥ үлэһиттэрбитигэр, нэһилиэк олоҕор мэлдьи кыттар, сүрэхтэрин сылааһын төрөөбүт-үөскээбит дойдуларын туһугар аныыр истиҥ дьоммутугар барҕа махтал тылларын ис сүрэхпиттэн аныыбын!
Нэһилиэк олохтоохторо бары да бүттүүн, тус үлэҕитин-хамнаскытын, айар-тутар кыаххытын төрөөбүт дойдугут чэчирии сайдарын туһугар аныыргыт — олус хайҕаллаах уонна махталлаах! Нэһилиэкпит кэскилэ, бастатан туран, хардарыта өйдөһүүттэн, ытыктаһыыттан, төрөөбүт түөлбэни тупсаҕай, сайдыылаах оҥорор күүстээх баҕаттан тутулуктаах.
Үгүлээппит чэлгийэ сайдарын туһугар туһуламмыт бырайыактары олоххо киллэрэн, саҥаттан саҥа үрдэллэри дабайан иһиҥ, үтүө дьыалаларгытынан киэркэйиҥ, «Бүлүү Үгүлээттэрэ дуо!» дэтиҥ!
Бары бииргэ сомоҕолостохпутуна, инникитин өссө да үгүһү ситиһиэхпит диэн эрэнэбин! Барыта табыллан, баар буоллун! Нэһилиэк хас биирдии олохтооҕун олоҕун уйгута улааттын, хаачыстыбата үрдээтин! Чэгиэн доруобуйаны, чэбдик, чөл туругу, или-эйэни, дьолу-соргуну баҕарабын! Хас саҥа үүммүт күн эһиэхэ түстүүр кыахтара ситиһиилэринэн эргийиэхтиннэр!
Эҕэрдэни кытта Татьяна Софроновна Софронова-Майынчы, Саха Өрөспүүбүлүкэтин култууратын туйгуна, арчыһыт, уйулҕаһыт, гирудотерапевт, чөл олоҕу түстээччи, коллекционер, «Уран Уйулҕа» киин салайааччыта.
— Бүлүү куоратыгар Марк Жирков аатынан култуура Дыбарыаьыгар ыытыллыбыт Үгүлээт нэһилиэгэ төрүттэммитэ 390 сыллаах үбүлүөйдээх тэрээһинэ өрө көтөҕүллүүлээхтик, үрдүк таһымнаахтык ыытыллыбытынан 12 сыл олорбут, үлэлээбит дойдум баһылыгын Лукин Октябрь Ивановиһы, Үгүлээт дьонун-сэргэтин ис — сүрэхтэн эҕэрдэлиибин!
Үгүлээт нэһилиэгэ чахчы чаҕылхай талааннаах дьонноох-сэргэлээх дойду! Үөрэппит оҕолорум, кыргыттарым Дьулустаана Реворьевна, Рада Александровна үрдүк таһымнаах үлэлэрин еөрөммүн наһаа астынным, чахчы нэһилиэк киэн туттар үлэһиттэрэ буола үүммүттэр. Республика, Аан дойду таһымнаах үтүөлээх артыыстар Клавдия, Герман Хатылаевтар, ВШМ студентката, российскай, международнай конкурстар кыттыылаахтара уонна кыайыылаахтара, кэскиллээх ырыаһыт Русалида Донская, республикага биллэр норуот ырыаһыта Федора Донская, диктор, чаҕылхай конферансье Мария Герасимова, 1 Күүлэттэн Геннадий Гаврильев концерды олус киэргэттилэр диэн сөҕө-махтайа бэлиэтэхпин багарабын. Орто оскуола коллектива, үөрэнээччилэрэ директор Ксенофонтова Л.А. көхтөөх кыттыыны ылбыттара, оскуола иитэр-үөрэтэр үлэтин чахчы үрдүк түмүгүн көрдөрдө. Уонна дьахталлар, уолаттар ансаамбыллара 2-3 куоласка арааран бэркэ ыллаатылар, биирдиилээн ырыаһыттар, сценка артыыстара кэнсиэрт таһымын өссө тупсардылар диэн бэлиэтиибин.
Үүнэ-сайда, чэчирии турдун Үгүлээт нэһилиэгэ, чагылхай талааннар ессе да арылла турдуннар!
Убаастабылы кытта Лукина М.Н. — Үгүлээт нэһилиэгин 2000- 2009 сс. үлэлээбит нэһилиэк Координационнай сэбиэтин салайааччыта.