Ааспыт сайын ыһыах күн Бүлүү куоратын Чапаев уулуссатын 35 аадырыһыгар турар элбэх квартиралаах дьиэ иккис мэндиэмэнэ эмискэ умайан күдэпчилэнэн тахсыбыта. Уоту утары охсуһааччылар – МЧС байыастара түргэнник кэлэ охсоннор баһаары сатабыллаахтык саба туппуттара, уоту умуруорбуттара хайҕаллаах.
Баһаартан элбэх хоромньуну көрсүбүт олохтоохтор аймахтарынан, билэр дьоннорунан, дьиэ арендалаан тарҕаһарга күһэллибиттэрэ. Ааспыт сайын тэриллибит сессияҕа улуус дьаһалтата дьоҥҥо көмөлөһөр туһугар дьиэни чөлүгэр түһэрэргэ 15 мөл. солк. суумалаах кирэдиит ыларга этиитин оройуон Сэбиэтин депутаттара өйөөбүттэрэ.
Үп-харчы көстүбүтүн кэннэ, куорат дьаһалтата күнү-дьылы баттаһа өрөмүөн үлэтин саҕалыырга, кыттааччылар аккаастанан, хаста да тендер тэрийбитэ. Бүтэһик уһугар өрөмүөн үлэтин суумата арыый түһэн, «ИП Капитонов Е.Ю.» кыайан, дьиэни чөлүгэр түһэрэргэ ылсыбыта.
Өрөмүөн үлэтэ балаҕан ыйыттан саҕаламмыта. Кылгас кэм иһигэр дьиэ уот сиэбит өһүөлэрин, истиэнэлэрин сорҕотун, үрдүн барытын уларыттылар. Билигин тутааччылар дьиэ сарайын туруоруутун саҕалаатылар, дьиэ үрдүн сылааһы тутар матырыйаалларынан бүрүйэ сылдьаллар, подъездар истиэнэлэрин саҥардан штукатуркалыыр үлэни саҥаттан ыыталлар.
Николай Куприянов.