Кулун тутар 30-31 күннэригэр Бүлүү куоратын «Эрчим» спорт комплексыгар биллиилээх судаарыстыбаннай, бэлитиичэскэй диэйэтэл, саха автономиятын төрүттэспит Степан Максимович Аржаков төрөөбүтэ 125 сылыгар, Бүлүү куората төрүттэммитэ 390 сылыгар аналлаах төрүт оҕунан ытыыга өрөспүүбүлүкэтээҕи «Федерация Чорооно» Кубога тэрилиннэ.
Былырыын, 2023 сыллаахха Чурапчыга ыытыллыбыт «Федерация Чорооно» Кубок хамаанданан күрэхтэһиитин кыайыылааҕынан Бүлүү улууһун охчуттарын хамаандата тахсыбыта. «Федерация Чорооно» Кубогын күрэхтэһиитэ кыайыылаах хамаанда дойдутугар тэриллэр. Ол үгэһинэн, быйыл саас Бүлүүгэ төрүт оҕунан ытыыга Саха сирин күүстээх охчуттара, ол иһигэр «Манчаары оонньууларын» кыайыылаахтара түмүстүлэр.
Чурапчыга бүлүүлэртэн спорт маастара Клара Спиридонова ситиһиилээхтик кыттан дьахталларга иккис бириистээх миэстэни ылбытын бэлиэтиэххэ сөп.
Кубок күрэхтэһиитин үөрүүлээх арыллыыта 18 хамаанда спортсменнара саалаҕа саха таҥастаах хааман киириилэриттэн саҕаланна. Саха оҕунан ытыыга охчуттар саха таҥастаах буолаллара ирдэнэр. Хаамандалар хааман киириилэрин Бүлүү улууһун охчуттарын хамаандатын үрдүкү тириэньэрэ, спорт маастара Филипп Соловьев салайда. Кини Бүлүү охчуттарын өрөспүүбүлүкэ таһымыгар, бастыҥнар ортолоругар таһаарбыт сүдү үтүөлээх Егор Соловьев кыра уола буолар.
Күрэхтэһии үөрүүлээх арыллыытыгар Саха Өрөспүүбүлүкэтин саха төрүт оҕунан ытыыга федерациятын бэрэссэдээтэлэ Виктор Бурцев, Бүлүү улууһун баһылыгын бастакы солбуйааччы Иван Евсеев, Бүлүү улууһун оҕунан ытыыга федерациятын салайааччы Эдуард Болдонов күрэхтэһии кыттыылаахтарын эҕэрдэлээтилэр, кыайыылары баҕардылар.
Оҕунан ытыыга улуустааҕы федерация салайааччытынан өр сылларга үлэлээбит улуус баһылыгын бастакы солбуйааччы Иван Евсеев күрэхтэһии туһунан бу курдук билиһиннэрдэ:
— Кубокка Саха сирин араас улуустарыттан 167 бастыҥ охчут 18 хамаандаҕа киирэн кытта сылдьар. Күрэхтэһиигэ уолаттар, кыргыттар, эр дьон уонна дьахталлар, бэтэрээннэр биирдиилээн бастыырга чемпион аатын былдьаһаллар, хамаанданан бастыыр уонна дьахталларга, эр дьоҥҥо муҥутуур кыайыылаахтары быһаарар көрүҥнэр бааллар. Хамаанданан күрэхтэһиигэ 6-лыы охчут кыттар.
Муҥутуур кыайыылаахтарга саа бириистэр туруорулуннулар, хамаанданан бастаабыкка 50 тыһ. солк., иккис миэстэҕэ – 30 тыһ., үһүс миэстэҕэ -20 тыһ. солк. көрүлүннэ. Күрэхтэһии бириистэрин, сүрүннээн, Бүлүү улууһун урбааньыттара үбүлээтилэр. Түгэнинэн туһанан, барыларыгар улахан махталбын тиэрдэбин!
Бастакы күн төрүт оҕунан ытааччылар куобах, кус көрүҥнэригэр күрэхтэстилэр, иккис күн саҕаланыыта тииҥ көрүҥҥэ далла мэндэйдилэр. 
Үс көрүҥ түмүгүнэн кыргыттарга Чурапчыттан Лилиана Баишева, уолаттарга Тааттаттан Александр Оконешников, дьахталларга Тааттаттан Ньургуяна Яковлева, эр дьоҥҥо Чурапчыттан Барыс Баишев, бэтэрээн дьахталларга Уус Алдантан Сусанна Аммосова, бэтэрээн эр дьоннорго Амматтан Егор Баранов Кубок кыайыылаахтарын үрдүк аатын сүктүлэр.
Бу көрүҥнэргэ бүлүүлэртэн Бөтүҥтэн 13 саастаах Каролина Унарова кыргыттарга иккис миэстэни ылары ситистэ, дьахталларга үс көрүҥ түмүгүнэн Клара Спиридонова уонна эр дьоҥҥо Николай Васильев бэрт кыранан хаалан, 4 миэстэлэргэ таҕыстылар. Клара Спиридонова үһүс призеры кытта тэҥ очукуону ылбытын бэлиэтиэххэ сөп. Иккис бочуоттаах миэстэни ылбыт Каролина Унарова төрүт оҕунан ытыыга спорт маастарыгар хандьытаат нуорматын толордо.
Муҥутуур кыайыылаахтары быһаарар ытыалааһын дьон болҕомтотун тарта, хатыһыылаахтык ааста. Дьахталларга Томпоттон Валентина Эверстова, эр дьоннорго Чурапчыттан Барыс Баишев Кубок муҥутуур кыайыылаахтарынан буоллулар.
Хамаанданан күрэхтэһиигэ Бүлүү хамаандатын састаабыгар киирбит Ирина Лобашева, Клара Спиридонова, Каролина Унарова, Николай Васильев, Николай Тихонов, Дмитрий Дмитриев бары тэҥҥэ ытыалаабыттарын түмүгэр Бүлүү хамаандата бастыаҕын бастаата, Кубогы икки сыл субуруччу ылары ситистэ!
Иккис миэстэҕэ Чурапчы, үһүскэ – Горнай, төрдүскэ –Уус Алдан, бэһискэ –Томпо, алтыска Таатта хамаандалара таҕыстылар.
Бүлүү хамаандатын охчуттарын улахан ситиһиилэринэн эҕэрдэлиэххэ, инники өттүгэр кыайыылары баҕарыахха!
Николай Куприянов.
Николай Куприянов, Саша Константинова фотолара.