Тыа хаһаайыстыбатын департамена билиһиннэрбитинэн, от ыйын 22 күнүн туругунан улуус ходуһаларыгар от бэлэмигэр 1433 отчут, 317 тыраахтар, 357 звено, ол иһигэр 37 механизациялаах звенолар үлэлии сылдьаллар.
Бу күҥҥэ улуус үрдүнэн 1774 гектар сир охсулунна, 1552 т от кэбиһилиннэ. Быйылгы былаан 26220 т окко тэҥнэһэр, бүгүҥҥү күҥҥэ былаан 5,92 % туолан иһэр. Кэпэрэтииптэр 282 т, бааһынай хаһайысыбалар 277 т, кэтэх хаһаайыстыбалар 993 т оту бэлэмнээтилэр.
Тыа хаһаайыстыбатын департаменын салайааччы Павел Иннокентьев бүгүҥҥү балаһыанньаны бу курдук билиһиннэрдэ:
— Окко улуустааҕы оперативнай ыстаап үлэлиир. От үүнүүтүн ыллахха, улуус үрдүнэн балаһыанньа биир тэҥ буолбатах, өрүс уҥуор от үүнүүтэ этэҥҥэ буоллаҕына, өрүс бэтэрээ нэһилиэктэр ходуһаларын үрдүк сирдэрэ курааҥҥа ылларда. Бөтүҥ, Тааһаҕар, Өкүндү отчутттара оппутун ылыахпыт дииллэр, оттон «Ампаардаах» хаһаайыстыба былырыын 200 т оту ылбыт сириттэн 50 т эрэ бэлэмнээтэ.
Ол иһин тыа хаһаайыстыбатын министиэристибэтигэр тиийэн, өрүс уҥуор 3 тыһ. т саппаас оту бэлэмниэхтээх 17 мобильнай биригээдэни тэрийэргэ 6 мөл. солк. үбү туруорустубут. Быһаарыы ылылларын кэтэһэбит. Саппаас оту бэйэбит хаһаайыстыбаларбытыгар үллэриэхпит.
— Хампа Арыылааҕар от үүнүүтэ былырыыҥҥыга тиийбэт, үрдүк сирэ курааннаата, уу таһыгар оттуу сылдьабыт, — диэн билиһиннэрэр ынах, сылгы тутар Семен Евсеев.
Николай Куприянов.
Семен Евсеев фотолара.