Тохсунньу 31 күнүгэр Дьокуускайга «Кыайыы 50 сыла» спорт уораҕайыгар волейболга бэтэрээннэр ортолоругар Саха өрөспүүбүлүкэтигэр бастыыр күрэхтэһии үөрүүлээхтик арыллыбыта.
Хас да күннээх тыҥааһыннаах күрэхтэһии олунньу 2 күнүгэр түмүктэннэ. Саха сиригэр спорт биир маассабай көрүҥэр 40-70 саастаах 550 тахса волейболист кытынна, барыта 62 хамаанда мээчик оонньуутугар күөн көрүстэ. Волейболга күрэхтэһии «Кыайыы 50 сыла» спорт уораҕайыгар уонна ХИФУ КФЕН спорт саалатыгар ыытылынна.
Эр дьон 40, 50, 60 уонна 70 үөһэ саастаахтарга арахсан, дьахталлар 40, 50, 60 уонна 65 үөһэ саастаахтарга хамаандаларынан мээчик күөрэтэ оонньоотулар.
Бүлүү волейболга хамаандалара дьахталларга 40 саастаахтарга үһүс бочуоттаах миэстэни, 50 үөһэ саастаахтарга төрдүс миэстэни, эр дьоннор 60 үөһэ саастаахтарга үһүс миэстэни, 70 үөһэ саастаахтарга иккис бочуоттаах миэстэни ыллылар!
Дьахталларга 40 үөһэ саастаахтарга саамай элбэх – 12 хамаанда кытынна. Бүлүүлэр күүстээх Амма улууһун уонна «Фаворит-строй» хамаандалар кэннилэриттэн күрэхтэһии педьесталын үһүс үктэлигэр тахсыбыттара үөрүүлээх сонун буолар.
70 үөһэ саастаахтарга иккис бочуоттаах миэстэни ылбыт Бүлүү хамаандатыгар күрэхтэһии саамай саастаах оонньооччута, быйыл 78 сааһын туолар Святослав Павлович Григорьев оонньообута кэрэхсэбиллээх.
— Сүрдээх үчүгэй күрэхтэһии буолан ааста, кыттааччыта элбэҕэ, хас биирдии хамаанда кыайыы туһугар туох баар сатабылын, күүһүн-уоҕун биэрэн оонньоото, тэрийээччилэргэ барҕа махтал, — диэн волейболистар бэлиэтииллэр.
Николай Куприянов.