Быйыл кэпэрэтииптэр уонна бөдөҥ бааһынай хаһаайыстыбалар күөх мэччирэҥнээх сайылыктарыгар барыта 2600 ыанар ынаҕы уонна субай сүөһүнү таһаарыахтара.
Улуустааҕы тыа хаһаайыстыбатын департаменын сүрүннүүр исписэлииһэ, Бүлүү улууһун кылаабынай зоотехнига Эдуард Михайлов билиһиннэрбитинэн, улууска тыа хаһаайыстыбатын бородууксуйатын оҥорон таһаарар кэпэрэтииптэр, 4 бөдөҥ бааһынай хаһаайыстыбалар 13 сайылыктарыгар барыта 2600 ыанар ынаҕы уонна субай сүөһүнү таһаарыахтара.
Бүгүҥҥү күн туругунан, улуус бары хаһаайыстыбаларыгар 11652 ынах сүөһүнү, ол иһигэр 4197 ыанар ынаҕы, 8092 сылгыны туталлар. Улуус кылаабынай зоотехнига быйылгы сүөһү кыстыга этэҥҥэ ааһан эрэрин, от саппааһа балачча баарын, сылгы эбии аһатыыттан таһаарыллан эрэрин, төрүөх үчүгэйин бэлиэтээтэ. Ол курдук, ыам ыйын 21 күнүгэр, барыта 2,5 тыһ. ынах, 900 кэриҥэ биэ төрөөтө. Былырыыҥҥыга тэҥнээтэххэ, 300 төбөнөн элбэх биэ төрөөбүт.
Элбэх ынах сүөһүнү тутар, үлэ тэрээһинин сатабыллаахтык тэрийэр, минньигэс арыытынан, этинэн биллэр «I Күүлэт» кэпэрэтиип Бүлүү улууһугар биир бастыҥ үлэлээҕинэн биллэр. Кэпэрэтиип улууска, баҕар, Саха сиригэр да суох үчүгэй сайылыгы оҥостон үлэлэтэр. Араас тэриллээх титиик, хас биирдии ыанньыксыкка туһунан дьиэ тутуллан, Чачаҥдаҕа үлэ киһитигэр — үрүҥ илгэни үрүлүтээччилэргэ үлэлиир, сынньанар усулуобуйалара толору тэрилиннэ. Итиннэ кэпэрэтиип салайааччытын үтүөтүн бэлиэтиир тоҕоостоох.
Кэпэрэтиип салайааччыта Елена Тутукарова соторутааҕыта хаар түһэн кэбиһэн, Чачаҥда сайылыгар 200-тэн тахса сүөһүнү ынахтарын бэс ыйын саҥатыгар таһаарыахтарын, от хаачыстыбата үчүгэй буолан сүөһү да туруга, үүт ыама да үчүгэйин, быйыл кыстык этэҥҥэ ааһан эрэрин бэлиэтээтэ, сайылыкка диэри суол оҥоһуутун туруорсалларын этиннэ.
Кэпэрэтиип ыанньыксыттара билигин күҥҥэ 1,5 т үүтү ыыллар, арыы оҥороллор, былааннарын толорон иһэллэр.
Николай Куприянов.