Ньукуолунтан саҕалаан 2006 сылтан бэттэх бэлиэтэммэтэх өҥүрүк куйаас түһүүтэ, өртөммөккө сэтиэнэх буолбут сирдээх-уоттаах Бүлүү улууһугар турбут хас да ойуур баһаардара авиалесоохрана, «Якутлесресурс», лесхоз үлэһиттэрин уонна нэһилиэнньэ күүстэринэн бохсулуннулар.
Ыксаллаах быһыылары сэрэтэр уонна туоратар, ойуур баһаардарыттан куттал суох буолуутун хааччыйар улуус дьаһалтатын хамыыһыйатын сэкиритээрэ Андрей Каратаев быйылгы баһаардары умуруоруу туһунан бу курдук билиһиннэрдэ:
— Ыам ыйын 30 күнүттэн улуус сиригэр-уотугар ойуур баһаарыттан үрдүк — IV кылаастаах кутталлаах балаһыанньа биллэриллибитэ. Саха Өрөспүүбүлүкэтин Ыксаллаах быһыылары сэрэтэр уонна туоратар, ойуур баһаардарыттан куттал суох буолуутун хааччыйар хамыыһыйатын быһаарыытынан дьон ойуурга сылдьалларыгар, аһаҕас уоту тутталларыгар хааччахтар көрүлүннүлэр. Ойуур баһаардарыттан кутталлаах кэмҥэ патруллуур бөлөхтөр үлэлэрэ күүһүрдүлүннэ.
Ойуур баһаардарыттан кутталлаах кэм саҕаланыыта Бүлүү улууһугар 4 ойуур баһаардара бэлиэтэннилэр. Ол иһигэр, Тоҕус (Балаҕаччы) нэһилиэгин сиригэр 2, Чернышевскай уонна Чочу нэһилиэктэрин сирдэригэр 1-дии баһаардар тура сырыттылар. Ити ойуур баһаардара барыта 854 га иэннээх сири хаптылар, итинтэн ойуурун сирэ 637 гектарга тэҥнэстэ.
Сиринэн кэтээн көрүүгэ киирсэр 3 ойуур баһаардара бастакы сууккатыгар умуруоруллубут буоллахтарына, авиация хонтуруолугар киирсэр биир баһаар 3 суукка иһигэр бохсулунна.
Быйылгы баһаардары кэмигэр умуруорууга идэтийбит тэрилтэлэр уонна нэһилиэнньэ кытыннылар. Ойуур баһаардара турбут төрүөттэрин кэтээн көрөр уорганнар уонна олохтоох дьаһалталар быһаарса сылдьаллар.
Бэс ыйын 4 күнүн туругунан улууска ойуур баһаардара суохтарын, ол эрэн, ойуур баһаардарыттан кутталлаах күннэр туралларын бэлиэтиэм этэ.
Николай Куприянов.