Биллэрин курдук, Бүлүү улууһун сиригэр-уотугар бэс ыйын 16 күнүттэн күүстээх ардах түһэ илик. Балтараа ыйдаах курааҥҥа ылларбыт улууска от үүнүүтэ эмиэ эриэ-дэхси. Былырыын угуттаабыт ходуһалардаах өрүс уҥуорнэһилиэктэр ходуһаларыгар от үүнүүтэ син «кэминэн»буоллаҕына, өрүс бэтэрээ нэһилиэктэр ходуһаларын үрдүк сирдэрэ курааҥҥа ылларда. Оннооҕор баччаҕа күөх туруохтаах хатыҥ сэбирдэҕэ от ыйын саҥатыттан саһаран барбыта кураан суоһун итэҕэтиилээхтик көрдөрөр.
Уһун кураан охсуута улууска билиннэ. Ол да буоллар, Бүлүү улууһун отчуттара өҥүрүк куйааска дьыл тахсар отторун бэлэмнээһиҥҥэ күүстээх үлэҕэ сылдьаллар. Сорох кэтэх хаһаайыстыбалар отторун булунан, кээһэн, кыбыыларыгар тиэйдилэр.
Быйылгы сылга сүөһү төбөтүн ахсаанынан көрөн Бүлүү улууһугар 26220 т оту бэлэмниир сорук турар. От ыйын 29 күнүн туругунан, бары көрүҥнээх хаһаайыстыбалар отчуттара 4946 т оту бэлэмнээтилэр, ол эбэтэр былаан 18,86 бырыһыан туолан иһэр.
Ходуһаҕа дьон, тиэхиньикэ тахсыытын үгэнэ. Ходуһаларга 428, ол иһигэр кэтэх хаһаайыстыбалар 324 тыраахтардара, 1787 отчут, ол иһигэр, 1594 кэтэх хаһаайыстыбалар моой отчуттара үлэлии сылдьаллар.
Улуус ходуһаларыгар барыта 415 звено тэриллэн оттуур. Тыа хаһаайыстыбатын оҥорон таһаарар бөдөҥ кэпэрэтииптэрэ 5534 т оту оттуур былааннаахтарыттан бүгүҥҥү күҥҥэ 756 т оту оттоотулар, оттон кэтэх хаһаайыстыбалар 3382 т оту бэлэмнээтилэр. Бааһынай хаһаайыстыбалар от ыйын 29 күнүн туругунан 808 т оту кэбистилэр.
Былырыын баччаҕа Бүлүү улууһугар 4382 т от бэлэмнэммитэ. Бүлүү улууһун ходуһаларыгар от үлэтин үгэнэ. Биир сайыҥҥы күн дьылы аһатар!
Николай Куприянов.