Бу күннэргэ Бүлүү улууһугар былырыын күһүҥҥү уһун ардахтартан, быйылгы сааскы хаар, халаан уутуттан оттуур ходуһалара улаханнык эмсэҕэлээбит нэһилиэктэргэ оттооһуҥҥа ыксаллаах быһыы-майгы биллэрилиннэ. Ынахтар мэччирэҥнэригэр ууну түөстэригэр диэри кэһэ сылдьан үрдүк хордогой сирдэри булалларын туһунан кэпсээн социальнай ситимнэргэ элбэх.
Улуустааҕы тыа хаһаайыстыбатын департаменын салайааччы Павел Иннокентьевтан оттооһун хаамыытын, үөскээбит балаһыанньаны бу курдук билиһиннэрдэ:
— Бүгүҥҥү, от ыйын 20 күнүн туругунан, улуус үрдүнэн күнү-дьыла баттаһа 1000-ча кэриҥэ отчут ходуһаҕа таҕыста, 312 звено, ол иһигэр, 27 мэхэньисээсийэлээх звенолар оттуу сылдьаллар, 200 тахса тыраахтар от бэлэмигэр кыттар.
Улуус үрдүнэн бүгүҥҥү күн туругунан 1239 гектар сир охсулунна, 745 т от оттонно.
Иллэрээ күн оттооһуҥҥа нэһилиэктэр баһылыктара кыттыылаах улуустааҕы суһал ыстаап мунньаҕа тэриллибитэ. Мунньахха өрүс уҥуор сытар элбэх сүөһүнү тутар, өлгөм оту оттуур ходуһалара ууга барбыт Кыргыдай, Балаҕаччы, Хаҕын, Халбаакы, өрүс бэтэрээ өттүгэр Чочу уонна Лөкөчөөн нэһилиэктэригэр оттооһуҥҥа ыксаллаах балаһыанньа биллэриллибитэ бигэргэннэ. Салгыы ыксаллаах балаһыанньалаах нэһилиэктэр элбиир түгэннэригэр, улуустааҕы суһал ыстаап быһаарыытынан улууска оттооһуҥҥа ыксаллаах быһыы-майгы биллэриллэрэ күүтүллэр.
Былырыын күһүҥҥү күүстээх ардахтар кэннэ оттуур ходуһаларбыт уулара кыайан барбакка сытар, 11 нэһилиэккэ уу түһэриитин үлэтэ ыытыллыахтаах, эбии I Күүлэт уонна Кыргыдай нэһилиэктэригэр ууну түһэрии үлэтэ тэриллиэхтээх.
Ууну түһэрии үлэтин кээмэйэ, үбүлээһинэ сири мелиорациялааһын уонна тыа хаһаайыстыбатын уунан хааччыйыы управлениетын Бүлүү улууһунааҕы филиалын тэрилтэтин кыаҕын таһынан таҕыста. Улууска эбии экскаватордар кэллилэр эрээри, биһиги управление атын филиалларыттан ууну түһэриигэ көмөнү көрдүүбүт. Ууну түһэрии үлэтин үбүлээһинигэр улуус, мелиорация управлениета, хаһаайыстыба кыттыахтаахтар. Хаһаайыстыба харчы көрдөҕүнэ эрэ улуус үбүлүүр кыахтаах.
Октябрь Лукин баһылыктаах Үгүлээт нэһилиэгэр бэйэлэрин экскаватордарынан урукку хорууларын ыраастаан ууга сытар ходуһаларын ууларын түһэрбиттэрэ хайҕаллаах тэрээһин буолар. Бэйэлэрэ муниципальнай тэрилтэ тэринэн, үлэлэтэн ыраах сытар нэһилиэккэ ууну түһэриини быһаараллар.Атыттарга холобур буолар итинник суолу эмиэ тутуһуохха сөп диэн көрөбүт.
Ил Дархан Айсен Николаев сорудаҕынан Саха Өрөспүүбүлүкэтин Бырабыыталыстыбатын Бэрэссэдээтэлэ Андрей Тарасенко оттооһун хаамыытын Бүлүү бөлөх улуустарыгар билсэ сылдьар, кини от ыйын 20 күнүгэр Бүлүү улууһугар кэллэ. Бырабыыталыстыба Бэрэссэдээтэлэ Кыадаҥдаҕа, Дьөккөҥҥө, Лөкөчөөҥҥө сылдьар. Оттооһуҥҥа тэрийэр мунньаҕар биһиги ууну түһэрии боппуруостарын инникиттэн күүскэ туруорсар былааннаахпыт.
Ити курдук, Бүлүү улууһугар ууга сытар оттуур ходуһалар ууларын түһэриигэ мелиорация өттүттэн элбэх үлэ кэтэһиллэр.
Николай Куприянов.