Бэҕэһээ, олунньу 8 күнүгэр улуус хоту уһугар Түҥ эбэни сыттана сытар Үгүлээт бөһүөлэгэр биир бэлиэ үөрүүлээх түгэн үүннэ. Бу күн олохтоохтор ыра санаалара туолла, хас да сыллааҕы үлэлэрин түмүгэ – балык ыыһыыр сыах үөрүүлээх арыллыыта тэрилиннэ.
Үөрүүлээх тэрээһиҥҥэ кыттыбыт тыа хаһаайыстыбатын миниистирэ Артем Александров, депутаттар оройуоннааҕы Сэбиэттэрин бэрэссэдээтэлэ Гаврил Корякин, тыа хаһаайыстыбатын управлениетын салайааччы Павел Иннокентьев, Үгүлээт баһылыга Октябрь Лукин балык ыыһыыр сыах арыллыытын бэлиэтиир кыһыл лиэнтэни быстылар.
Ыраас уулаах Түҥ эбэ өлгөм балыгынан, ураты амтаннаах эмис алыһарынан, тэҥэлитинэн, сордоҥунан, быйытынан, чомугурунан биллэр. Ол иһин, хас да сыллааҕыта айылҕа бэлэҕин туһанарга Октябрь Лукин баһылыктаах Үгүлээт дьаһалтата балык ыыһыыр сыаҕы арыйан үлэлэтэргэ туруммута…Олохтоох дьаһалта элбэх уустуктары туораан туруорумммут сыалын ситистэ – Бүлүү улууһугар бастакы балык ыыһыыр сыаҕы арыйда.
Октябрь Лукин билиһиннэрбитинэн, өссө 2020 сыллаахха улуус дьаһалтата балык ыыһыыр оһох атыылаһарга 1,1 мөл. солк. тахсаны бэйэтин бүддьүөтүттэн көрөн көмөлөспүт, олохтоох дьаһалта 56 кв м дьиэни тутарга, гаас ититиини киллэрэргэ 1,5 мөл. солк көрбүт. Дьиэ тутуутунтүмүгэр тиэрдэргэ олохтоох «Хотугу Бүлүү» муниципальнай тэрилтэ, дьаһалта үлэһиттэрэ улахан күүс-көмө буолбуттар. Улуустааҕы тыа хаһаайыстыбатын департамена сыах үлэҕэ киирэригэр эмиэ күттүөннээх көмөнү оҥорбут.
Сыахха билигин балык ыыһааччынан Станислав Васильев үлэлиир. Бүлүү улууһугар кини курдук идэтийбит ыыһааччы соҕотох диэххэ сөп. Кини социальнай хантыраагынан ылбыт үбүн упаковкалыыр, тоҥорор тэриллэри, электроннай ыйааһын, иһит-хомуос уонна да атыны атыылаһарга туттубут. Станислав Васильев үлэтин бу курдук билиһиннэрдэ:
— Кыра эрдэхпиттэн балыктыыбын, Түҥ эбэҕэ балык элбэх. Балык ыыһыыр сыахпытыгар 42 т балыгы бултуурга көҥүллээх «Үнүгэс» кэпэрэтиип балыгын ыыһыахпыт. Кэпэрэтиип 20 т собону, 22 т өрүс балыгын бултуурга квоталаах. Дьонтон балык тутар быраахтаахпыт.
Оһохпут «итиилии», «тоҥнуу» ыыһааммыт, хаппыт балыгы бэлэмниир кыахтаах. Ыыһыыр оһоххо 350 киилэ балык киирэр. Балыгы эрдэттэн тустаах ууга сытыарабыт, онтон оһох иһигэр иилэбит. Мас кыырпаҕа умайар буруотун оһох иһигэр мотор оборон ылан эргитэр. Ыыһыырга өрүс кытыытыгар үүнэр хаппыт талах ордук.
Ити курдук, улуус кырыы бөһүөлэгэр атыттарга холобур буолар курдук олохтоох экономиканы сайыннарыыга биир сэмэй хардыы оҥоһулунна. Сыах толору үлэлээтэҕинэ аатырар Түҥ эбэ ыыһаммыт балыга улуус иһигэр, таһыгар атыыга хамаҕатык барыа, олохтоохтор дохуот аахсан олохторун таһымын үрдэтиэхтэрэ.
Николай Куприянов.