Бүлүү улууһугар «Хаарбах уонна саахалланар туруктаах дьиэттэн көһөрүү» бырагырааматынан сылын аайы үөһүнэн-тыанан элбэх дьиэ тутуллан үлэҕэ киирэн иһэр, дьон олорор усулуобуйатын тупсаран хааччыллыылаах квартираларга көһөллөр. Быйыл төрүттэммитэ 390 сылын бэлиэтиир кырдьаҕас Бүлүү куоратыгар хас да саҥа үстүү мэндиэмэннээх таас дьиэлэрдээх кыбаарталлар баар буоллулар.
Быйылгы сылга бэйэтин көдьүүһүн көрдөрбүт бырагырааманан төһө элбэх дьиэ тутулла турарын, эһиил үлэҕэ киириэхтээх эбийиэктэр тустарынан улуус дьаһалтатын бырамыысаланнаска управлениетын салайааччытын солбуйааччы Николай Саввинов билиһиннэрэр:
— Ааһан эрэр 2024 сылга «Хаарбах уонна саахалланар туруктаах дьиэттэн көһөрүү» бырагырааматынан күһүн үбүлүөйдээх Бүлүү куоратын күнүгэр саҥа Федор Бубякин уулуссатыгар 2 элбэх квартиралаах дьиэ үлэҕэ киллэриллибитэ. Саҥа дьиэлэр хааччыллыылаах квартираларыгар дьон эргэ, хаарбах дьиэлэртэн көспүттэрэ уонна тулаайах оҕолор киирбиттэрэ. Иккилии мэндиэмэннээх тупсаҕай дьиэлэри «Сигма» уонна «Промстроймонтаж» ХЭУо-лар туппуттарын бэлиэтиэм этэ.
Саҥа дьыл иннинэ Бүлүү куоратыгар Ленин уулусса 1/2 аадырыһыгар «Сигма» ХЭУо туппут 2 квартиралаах дьиэтин күлүүстэрэ хаһаайыннарыгар үөрүүлээх быһыыга-майгыга туттарыллыахтара.
Быйыл улуус ыраах хоту уһугар сытар Үгүлээт нэһилиэгэр 7 квартиралаах таас дьиэ үлэҕэ киирэрэ былааҥҥа турар. «Аурис» ХЭУо үлэтин түмүктээн эрэр, бу күннэргэ дьиэ ититиитэ холбонуллуохтаах.
2025 сылга киириэхтээх эбийиэктэри билиһиннэрдэххэ, Бүлүү куоратын «Көтөх» микро-оройуонугар 6 улахан дьиэ сыбаайалара түһэрилиннилэр. Кэлэр сылга бэдэрээччиктэр тэтимнээхтик үлэлээн саҥа дьиэлэри үлэҕэ киллэриэхтээхтэр.
Быйыл Бүлүү куоратын Мир уулусса 100 нүөмэрдээх аадырыһыгар 21 квартиралаах түөрт мэндиэмэннээх элбэх квартиралаах дьиэ тутуута саҕаламмыта. Эбийиэк хантыраак быһыытынан эмиэ эһиил үлэҕэ киириэхтээх.
Итини сэргэ, КыҺыл Сыыр бөһүөлэгэр спортивнай комплекс дьиэтэ тутуллан, ис үлэтэ түмүктэнэн эрэр, улахан эбийиэк тохсунньу ыйга үлэҕэ киириэхтээх.
Николай Куприянов.