Бу күннэргэ улуус баһылыга Сергей Винокуров салайааччылаах Бүлүү улууһун дэлэгээссийэтэ анал байыаннай дьайыы буола турар сиригэр тиийэн биир дойдулаахтарын көрсөр, гуманитарнай көмөнү тиэрдэр. Бүлүү улууһа СВО-ҕа кыттар биир дойдулаахтарыгар уопсайа 54 мөл. солкуобай суумалаах көмөнү оҥордо.
Бүлүү улууһун дэлэгээссийэтин састаабыгар Кыһыл Сыыр бөһүөлэгин баһылыга Юрий Гвызин, Чернышевскай, Хаҕын нэһилиэктэрин баһылыктара Антон Амбросьев уонна Роман Софронов, Иван Гоголев аатынан кииннэммит улуустааҕы бибилэтиэкэ салайааччыта Николай Харлампьев киирэннэр биир дойдулаахтарын көрсө, көмөнү туттара сылдьаллар. Кыһыл Сыыр баһылыга Юрий Гвызин анал байыаннай дьайыы буола турар сиригэр улуус дэлэгээссийэтин састаабыгар хаһыс да сырыытын киирсэн сылдьарын бэлиэтиэххэ сөп.
Бастакы күннэргэ анал байыаннай дьайыы буола турар сиригэр улуус дэлэгээссийэтин кытта СВО-ҕа сылдьар байыаннайдарга көмөнү оҥорор улуустааҕы пуун салайааччыта Мария Томская уонна солбуйааччыта Елена Сивцева үлэлэспиттэрэ, кэлин бэйэлэрин бырагыраамаларынан үлэлэрин салҕаатылар.
Улуус баһылыга Сергей Винокуров улуус дэлэгээссийэтин анал байыаннай дьайыы буола турар сиригэр сырыытын бу курдук билиһиннэрдэ:
— Бүлүү улууһа байыаннай дьайыы саҕаланыаҕыттан СВО кыттыылаахтарыгар, биир дойдулаахтарыгар, кинилэр дьиэ кэргэннэригэр сүҥкэн көмөнү оҥорор. Улуус дэлэгээссийэтэ анал байыаннай дьайыы буола турар сиригэр байыаннайдары көрсө, гуманитарнай көмөнү туттара хаста да сырытта.
Иллэрээ күнтэн, ол аата сэтинньи 30 күнүттэн анал байыаннай дьайыы буола турар сиригэр тиийэн үлэлэһэ сылдьабыт. Ытык иэстэрин бэриниилээхтик толоро сылдьар элбэх биир дойдулаахтарбытын көрүстүбүт. Уолаттарбыт сакаастарынан гуманитарнай көмөнү, ол эбэтэр матасыыкылтан саҕалаан рацияларга тиийэ аҕалан туттара сылдьабыт. Байыаннайдарга улуус амарах санаалаах дьоно-сэргэтэ хомуйбут уонна дьиэ кэргэннэрэ ыыппыт күүтүүлээх күндү кэһиилэрин илиилэригэр туттардыбыт.
Уолаттарбыт биһигини кытта көрсүһэллэриттэн, байыаннай дьайыыларга туттар көмөнү ылалларыттан, төрөөбүт дойдуларын иҥэмтэлээх, амтаннаах аһын-үөлүн амсайалларыттан, сонуннары истэллэриттэн үөрүүлэрэ улахан.
Гуманитарнай көмөнү оҥорууга Бүлүү улууһугар соторутааҕыта тэриллибит «Кыайыы» пуондата улахан өйөбүлүн бэлиэтиэм этэ.
Уолаттар санаалара күүстээх, кэпсэтиилэргэ «Кыайыы биһиэнэ буолуо!» — дииллэр, кыайыыга бүк эрэллээхтэр. Үһүс сылларын сэриилэһэ сылдьар уолаттарбыт урукку курдук буолбатах, балаһыанньа тубуста дииллэр, санаалара бөҕөх.
Былаан быһыытынан бу күннэргэ анал байыаннай дьайыы буола турар сиригэр биир дойдулаахтарбытын көрсө салгыы үлэлиэхпит.
* * *
Сэтинньи 1 күнүгэр анал байыаннай дьайыы кыттыылаахтарыгар оҥоһуллубут көмө 43 мөл. солк. суумаҕа тэҥнэспитэ. Улуустааҕы «Кыайыы» пуондатын дириэктэрэ Александр Комаров билиһиннэрбитинэн, пуонда бу сырыыга гуманитарнай көмөнү оҥорууга улуус тэрилтэлэрэ аһардыбыт 5 мөл. солк. тахсаны үбүлээбит. Улуус дьаһалтата 6 мөл. солк. көрбүтэ. Ити курдук, Бүлүү улууһа анал байыаннай дьайыы кыттыылаахтарыгар көмөтө 54 мөл. солк. тахса суумаҕа тэҥнэстэ.
Николай Куприянов.
Фото: Александра Яковлева.